සරණාගතයන් ලෙස ඊශ්‍රායලයට ඇතුළු වීමේදී බලපාන කරුණු පිළිබඳ සහ නීත්‍යානුකූල ක්‍රමවේදය පිළිබඳව ඔබට යම් මඟ පෙන්වීමක් කිරීම මෙහි අදහසයි.

සරණාගත වීසා පිළිබඳ නීති, වසරින් වසර වෙනස් වන බැවින් මෙයින් ලබා ගන්නා අදහසත්, පවතින නීතිමය රාමුවත්, දැන සිටීම වැදගත් වෙයි.

සරණාගත වීසා පිළිබඳව පහත අවස්ථා වෙයි

1. සරණාගතයන් ලෙස අයදුම්කර, refuge වීසා ලැබෙන තුරු, තාවකාලික බලපත්‍ර යටතේ ඊශ්‍රායලය තුළ ජීවත්වන (asylum)
2. සරණාගතයන් ලෙස අයදුම්කර, ඊශ්‍රායල් රජය සිදුකරන ක්‍රමවේදය හරහා ගොස්, සරණාගත වීසා අනුමතව, (refuge visa) යටතේ ජීවත් වන.

බොහෝ විදේශිකයන්ගේ අදහස වන්නේ, සරණාගත වීසා යනු (Refugee visa) තමන්ගේ රැකියාවේ වීසා අවසන් වීමෙන් පසු, ඊශ්‍රායලය තුළ ජීවත් විය හැකි පහසු ක්‍රමයක් ලෙසයි.

සැබෑව නම් සරණාගත වීසා යනු කෙනෙක්ට තමන්ගේ රටට නැවතත් යෑම හෝ රට තුළ ජීවත්වීම, ජීවිත ආරක්‍ෂාවට තර්ජනයක් විය හැකි අවස්ථාවක, ජීවත්වීමට නීතිමය රාමුවක් ලබා දෙන රැකවරණකි.

සරණාගත වීසා ලබා ගැනීමට සුදුසුකම්

පුද්ගලයෙක්ට තමන්ගේ රටට යෑම, ඔහුට ජීවිත තර්ජනයක් ගෙනදේ නම්, විශේෂයෙන් ඔහුගේ ආගම, ජාතිය, කුලය, ඔහු විශ්වාස කරන දේශපාලන අදහස්, හෝ ඔහු සාමාජිකත්වය දරන සංගම් හේතුකොට ඔහුට ජීවිත තර්ජනයක් ඇති බව ඊශ්‍රායල් රජයට හේතු සහිතව ඔප්පු කර පෙන්වීමට හැකි නම් එය සලකා බලයි.

ආර්ථික අපහසුතා, ණය, පවුලෙන් ලැබෙන පීඩනය, රැකියා අහිමිවීම හෝ ඊශ්‍රායලය තුළ රැඳීමේ කැමැත්ත සරණාගත තත්ත්වයක් ලබා ගැනීමට උපකාර නොවේ.

සරණාගත භාවය ලබා ගැනීම සඳහා අයදුම්පත් ක්‍රමවේදය

රාජ්‍ය සේවා වෙබ් පිටුවේ ඇති අන්තර්ජාල අයදුම් පත ඉංග්‍රීසි භාෂාවෙන් පුරවන්න. (Gov.il)

ගුවන් ගමන් බලපත්‍රයේ පැහැදිලි පිටපතක්ද ඒ සමග upload කරන්න.

ලැබුණු විට, ඒ බව සනාථ කර ඔබට පණිවිඩයක් ලැබෙනු ඇත.

එය ක්‍රියාදාමයේ ආරම්භයයි.

ඔබේ අයදුම් පත පරීක්ෂා කර, ඔබට ජනගහන හා සංක්‍රමණ අධිකාරියට (PIBA) කැඳවීමක් ලැබෙනු ඇත.

විශේෂ කරුණු

ඔබ සිහි තබා ගත යුතු එක් විශේෂ කරුණක් වෙයි.

අපැහැදිලි, දත්ත අසම්පූර්ණ දත්ත සහිත අයදුම් පත, ඔබගේ සරණාගත වීසා ලබා ගැනීමේ අවස්ථාව අඩාළ කරනු ඇත.

දත්ත ලබාදීමේදී:

• නම ඇතුළු පෞද්ගලික තොරතුරු

• අදාළ දින වකවානු

• තමාගේ සංචාර විස්තර

• තමාට පවතින දිගුකාලීන ජීවිත තර්ජන හෝ බියට හේතු

නිවැරදිව ඉදිරිපත් කළ යුතුය.

අදාළ කාලය තුළ ක්‍රියාත්මක වීම

ඊශ්‍රායලයට පැමිණ වසරක් ගත වීමට පෙර අයදුම්පත් පුරවා භාරදිය යුතුය.

එසේ නොවන අවස්ථාවක ඒ පිළිබඳව විශේෂ හේතුවක් හෝ සාධක තිබිය යුතුය.

සරණාගත වීසා අයදුම් කිරීමට අදාළ ලියකියවිලි

• ගුවන් ගමන් බලපත්‍රය

• අනන්‍යතාවය සම්බන්ධ ලේඛන, පුද්ගලයන් හඳුනා ගැනීමේ කාඩ් පත වැනි

• පොලිස් සහතික

• උසාවි නියෝග

• සෞඛ්‍ය වාර්තා

• බිය වැද්දීම් හා තර්ජනය කිරීම් පිළිබඳ කරුණු ඇතුළත් පණිවිඩ

• ක්‍රියාකාරී දේශපාලනයට සම්බන්ධ බවට සාක්ෂි

• ජීවිත තර්ජනය ලැබෙන කිසියම් සමූහයක සාමාජිකත්වය දරණ බවට සාක්ෂි

• සරණාගත භාවයට හේතු දැක්විය හැකි තමාගේ ජීවිත කතාව සම්බන්ධ කරුණු

(විශේෂයෙන් වැදගත් වන්නේ සරණාගත භාවයට අයදුම් කිරීම සඳහා ඊට සම්බන්ධ කරුණු සෘජුවම සනාථ කළ හැකි සාක්ෂි ලියකියවිලි කිහිපයක් හෝ ඉදිරිපත් කිරීම, අනවශ්‍ය බොහෝ කරුණු ගෙනහැර පෑමට වඩා වැදගත් වන බවයි.)

ඔබගේ සබැඳි ලියකියවිලි ඇත්තේ වෙනත් භාෂාවකින් නම්, මුල් පිටපත් ආරක්ෂිතව තබාගෙන පසු පිටපත් යොදා ගනිමින් ක්‍රියාවලිය අරඹන්න.

සම්මුඛ පරීක්ෂණයේදී විශ්වාසවන්ත භාවය වැදගත් වන්නේ ඇයි

මෙම ක්‍රියාවලියේ වැදගත්ම සංවේදී අංගය සම්මුඛ පරීක්ෂණයයි.

ඔබට සම්බන්ධ කරුණු පැහැදිලිව තිබේද, නොකඩවා සිදුවූ සිදුවීම් ද, විශ්වාස කටයුතුද යන කරුණු පිළිබඳව බලධාරින් විසින් නිරන්තරයෙන් විමසිලිමත් වනු ඇත.

ඔබේ ජීවිතයට ඇතිවූ සැබෑම තර්ජනය ඉදිරිපත් කරන්න.

ඔබ ඉදිරිපත් කළ අයදුම්පත සමග සම්මුඛ පරීක්ෂණයේ තොරතුරු හා පසුව කරන ප්‍රකාශ එකිනෙක හා නොගැලපේ නම් එය වීසා ලබා ගැනීමට ගැටළුවක් වනු ඇත.

A 2(a)(5) වීසා හැඳින්වීම

A 2(a)(5) වීසා යනු සරණාගත වීසා සඳහා අයදුම් කර තිබියදී ලබා දෙනු ලබන තාවකාලික ලේඛනයයි.

එය කිසිසේත්ම B/1 හා සමාන නොවේ.

B/1 හරහා ලැබෙන අයිතිවාසිකම් හෝ දිගුකාලීනව සේවය කළ හැකි හැකියාවක් ඉන් නොලැබේ.

එය තවමත් නොවිසඳුනු ගැටලුවක් වෙනුවෙන් දෙන තාවකාලික බලපත්‍රයක් පමණි.

සැබෑ තීරණය ලැබෙන තුරු මේ යටතේ රැකියාවක් කළ හැකිද?

A 2(a)(5) කියනු රැකියා වීසා බලපත්‍රයක් නොවේ.

එහෙත් මෙය සතු, එහෙත් තවමත් නීතිමය සරණාගත වීසා බලාපොරොත්තුවෙන් සිටින පුද්ගලයෝ රැකියාවක් කරති.

එහෙත් ඔබ මතක තබා ගත යුත්තේ A 2(a)(5) වීසා යනු රැකියා වීසා නොවන බවත්, එයින් රැකියාවක් කිරීම තහනම් නොකරන බවත්ය.

ඒ අවස්ථාවේ රාජ්‍ය ප්‍රතිපත්තීන්ට අනුව A 2(a)(5) තාවකාලික වීසා සඳහා ඇති බලතල ද වෙනස් වේ.

2(a)(5) වීසා සඳහා ඇති සීමාවන්

මෙම වීසා මත ජීවත්වෙන කාලයේදී, ඔබට පැනවෙන සීමාවන් අතර සංචාරක සීමාද වෙයි.

එක්සත් ජාතීන්ගේ සරණාගතයන් පිළිබඳ මහ කොමසාරිස් කාර්යාලීය (UNHCR) පැනවීම් අනුව මෙම වීසා දරණ පුද්ගලයින්ට ඊශ්‍රායලයෙන් පිටවී, නැවතත් 2(a)(5) වීසා යටතේ ඊශ්‍රායලයට පැමිණීමේ හැකියාව නැත.

එය ඔබේ වාර්ෂික නිවාඩුව සඳහා පමණක් නොව අත්‍යාවශ්‍ය පවුලේ කටයුත්තක්, සෞඛ්‍යමය හේතුවක්, අවම වශයෙන් අවමංගලයකට සඳහා හෝ ඉඩක් නැත.

2(a)(5) වීසා සඳහා අයදුම් කරන ඔබ, එයින් ලැබෙන ධනාත්මක අවස්ථාව මෙන්ම සෘණාත්මක බලපෑමද දැන සිටිය යුතුය.

ඔබ අයදුම් කළ සරණාගත වීසා අනුමත වීමෙන්

එවිට ඊශ්‍රායලය ඔබ සරණාගතයෙක් ලෙස හඳුනා ගනී.

ඔබේ නීතිමය රාමුව වෙනස් වෙයි.

UNHCR කෙටුම්පත් වලට අනුව සරණාගත අනුමැතිය ලැබීමේදී A/5 තාවකාලික වීසා ක්‍රමයක් ලැබෙන අතර එය වාර්ෂිකව අලුත් කළ යුතුය.

එමෙන්ම ඔබට රැකියාවක් සඳහා අනුමැතිය ලැබෙන අතර ජාතික සෞඛ්‍ය රක්ෂණයක හිමිකම් ලබයි.

එහෙයින්

• සරණාගත වීසා සඳහා අයදුම් කිරීම
(සරණාගත අනුමැතිය අවිනිශ්චිතය)

• 2(a)(5) තාවකාලික ලියවිල්ලක් යටතේ ජීවත්වීම
(සරණාගත අනුමැතිය අවිනිශ්චිතය)

• A/5 වීසා ලැබීම
(සරණාගත භාවය අනුමතයි. එහෙත් වීසා වාර්ෂිකව අලුත් කළ යුතුයි.)

යන වෙනස් තත්ත්වයන් පැහැදිලි කරගත යුතුය.

ඔබගේ සරණාගත අයදුම් පත ප්‍රතික්ෂේප වුවහොත්

එසේ ප්‍රතික්ෂේප වීම ඔබව සම්පූර්ණයෙන්ම ඉවත දැමීමක් නොවේ.

ඔබට නැවත සලකා බැලීමකට ඉල්ලීමක් කළ හැක.

ඊශ්‍රායල් රජය විසින්ද නැවත ඒ පිළිබඳව සලකා බැලීමක් සිදුකරයි.

එහෙත් මෙවැනි පසු සලකා බැලීමක් සඳහා කල්ගතවනවාක් මෙන්ම ලැබීමේ හෝ නොලැබීමේ අවදානමකින්ද යුක්තය.

පොදුවේ සිදුවන අතපසුවීම්

• මෙය ඊශ්‍රායලයේ ජීවත්වීමට හැකියාව ලබාදෙන සාමාන්‍ය ක්‍රමවේදයක් යැයි සැලකීම
(සැබැවින්ම මෙය තමන්ගේ මව් රට තුළ අනාරක්ෂිත වූවන්ට රැකවරණය සඳහාය)

• සරණාගත අයදුම්පත් යොමු කිරීමට වසරකට වැඩි කාලයක් ගතවීම

• සරණාගත වීසා ලබා ගැනීම සඳහා සත්‍ය තොරතුරු ඉක්මවූ කතාවක් ගොඩනැගීම

• තැරැව්කරුවන්, උපදේශකයන් සහ මිත්‍රයන් හරහා මෙය සිදුකරවා ගැනීමට මුදල් වැය කිරීම

ඔබ සපයන දත්ත නිවැරදි නොවීම, සැබෑ ගැළපීමක් නොවීම, දින වකවානු නොගැලපීම, අත්‍යවශ්‍ය ලේඛන විනාශ වී හෝ අස්ථානගත වී තිබීම, එකකට එකක් නොගැලපීම යන කරුණු බොහෝවිට ඔබට අවාසි සහගත විය හැක.

එමෙන්ම ඔබ වංචාවකට හසු නොවීමට වග බලා ගන්න.

මෙම ක්‍රියාවලිය තුළ ඔබ මානසික පීඩනයකින් යුත් අවස්ථාවලදී වංචා සහගත පුද්ගලයෝ මැදිහත්ව මුදල් වංචා කිරීමට පුළුවන.

වීසා ක්‍රියාවලිය තුළ එය ඉක්මන් කිරීම් හෝ පොරොන්දු දීමේ හැකියාවක් බාහිර පුද්ගලයන්ට නොමැත.

එසේ කරන්නේ නම් එයම වංචා සහගත බවට ලකුණෙකි.

රාජ්‍ය නිල දත්ත ලබා ගන්නේ කෙසේද

Gov.il නිල වෙබ් අඩවියෙන් සරණාගත වීසා අයදුම් පත හරහා විස්තර දැනගත හැක.

UNHCR Israel Help වෙබ් අඩවිය:

UNHCR Israel Help

මෙහි ලේඛන පිරවීම, අයිතිවාසිකම්, යුතුකම්, වංචා කිරීම් පිළිබඳ පැහැදිලි කරයි.

මිතුරු හවුල් වලින් ලැබෙන දත්තයන් විමසා බැලීම කළ හැක.

එහෙත් ඒ මත තීරණ නොගත යුතුය.

තීරණ ගැනීමේදී විශ්වාස කළ යුත්තේ රාජ්‍ය නිල දත්තයන් පමණි.

නීතිමය තොරතුරු පමණි.

ඔබ මතක තබා ගත යුතු කරුණ නම් 2(a)(5) වීසා, සරණාගත අයදුම් කිරීම්, එහිදී ලැබෙන තාවකාලික බලපත්‍ර යන බොහෝ දේ වෙනුවෙන් බොහෝ පුද්ගලයින් සරණාගත වීසා (refuge visa) යන පොදු පදය භාවිතා කරන බවයි.

ඔබට සැබෑ ලෙසම ඔබගේ රටේ අනාරක්ෂිත බවක් හැඟේ නම්, ඒ සඳහා සරණාගත වීසා අයදුම් කිරීමේදී, නීතියානුකූල ක්‍රමවේදයක් මත, නිරවුල්ව, ක්‍රමවත්ව අයදුම් කිරීම සරණාගත වීසා ලබා ගැනීමේ ක්‍රමවේදය බව.

The post සරණාගත වීසා ලබා ගැනීම සම්බන්ධව ශ්‍රී ලාංකිකයන් දැනුවත් කිරීම appeared first on LANKACONNECT.

අවසාන ලේඛන සහ නැවත ඇතුල්වීමේදී ඇතිවිය හැකි ගැටලු

ඊශ්‍රායලයේ ශ්‍රමික ඔබට නැවතත් මව්බිමට පිටත් වීමේදී කලබලය සහ මානසික ප්‍රකම්පනය නිසා ඇතැම් අවශ්‍ය ක්‍රියාකාරකම් මගහැරියා හැක.

මේ හේතුව නිසා නැවතත් ඊශ්‍රායලයට එන විට බොහෝ ගැටලු වලට මුහුණ දීමට සිදුවනු ඇත.

මනා කළමනාකරණයක් යටතේ ඊශ්‍රායලයෙන් පිටවී, නැවතත් පැමිණෙන්නේ කෙසේදැයි සොයා බලමු.

ඔබ ඊශ්‍රායලයෙන් පිටවීමට දින 60 කටවත් පෙර ඒ සඳහා සූදානම් වන්න

• ඔබගේ වැටුප් ගැටලු පිටවීමට පෙර විසඳා ගැනීමටත්

• වර්ෂ අවසානය ලැබෙන පාරිතෝෂික දීමනාව ගණනය කොට ලබා ගැනීමටත්

• අදාළ ලියකියවිලි නැවත ලබා ගැනීමටත්

වැනි බොහෝ ක්‍රියාකාරකම් වලට මුහුණපෑමට සිදුවෙයි.

ඔබ ඊශ්‍රායලයෙන් පිටත් වෙන දිනය ඔබගේ සේවායෝජකයාට WhatsApp message හෝ email හරහා ලිඛිතව දැනුම් දෙන්න.

ඔවුන් ඒ සඳහා දක්වන ප්‍රතිචාර පණිවිඩය ද ගබඩාකොට තබාගන්න.

ඔබ ඔවුන් දැනුවත් කරනවා සේම, ඔවුන්ට ඔබගේ අවසන් ගිණුම් සැකසීමට ඉඩ ප්‍රස්ථාව සැලසෙයි.

නීතියෙන් ඔබ වෙත ගෙවීමට ඇති මුදල් පිළිබඳ විමසිය යුතුය

ඔබගේ අවසන් මාසයේ වැටුප

මෙයට, ඊට පෙර මස සියලුම දින ඇතුළත්ව, ඔබගේ දැනුම් දීමේ කාලයත් ඇතුළත්ව ගෙවීම් කළ යුතුය.

සියලුම එකතු කිරීම් සහ අඩු කිරීම ඇතුළත් අවසන් මස වැටුප් පත ලබා දෙන ලෙස ඉල්ලීමක් කරන්න.

ඔබ නොගන්නා ලද වාර්ෂික නිවාඩු

ඔබ නොගන්නා ලද වාර්ෂික නිවාඩු සඳහා ඔබට ගෙවීම් කළ යුතුය.

එය නීතියෙන් ඔබට ලැබෙන අයිතිවාසිකමකි.

සිදුවනතුරු බලා නොසිට ඔබ ඒ පිළිබඳව විමසිය යුතුය.

පාරිතෝෂික දීමනා (Severance pay – Pitzuim)

ඔබ මෙම සේවායෝජකයා සමග වසරක්වත් සේවයේ නියුතු වූවානම් ඔබට පාරිතෝෂික දීමනා හිමිය.

ඔබගේ මාසික වැටුපට අනුකූලව ලැබෙන මෙම පාරිතෝෂිකය ගණනය කොට දැනගන්න.

ඇතැම් විට සේවායෝජකයින් ඔබට මෙම පාරිතෝෂික දීමනා හිමි නොවන බව පැවසුවහොත් ඒ පිළිබඳව පහත ආයතනයෙන් HaKeren (1-222-3450) විමසා දැනගන්න.

ඔවුන් ඒ සඳහා ඔබට සහය වනු ඇත.

අවුරුදු තුනකට වඩා සේවය කලවිට ලැබෙන පාරිතෝෂික දීමනාව සාමාන්‍යයෙන් සේවා යෝජකයන් විසින් පරිතෝෂික ගිණුමෙහි තැන්පත් කරනු ලැබේ.

ඔබට එයට පිවිසීමට හැක.

ඔබගේ සේවායෝජකයා හෝ ඒජන්සියෙන් ඔබගේ පාරිතෝෂික දීමනාව හා සම්බන්ධයෙන් ගිණුම් අංකය (keren) දැනගන්න.

ඔබගේ ජාතික රක්ෂණය – Bituach Leumi refund

ඔබ සේවය කළ කාලයේ ඔබේ වැටුපෙන් කපා ගත් ජාතික රක්ෂණ වාරිකයෙන් කොටසක් ඔබ ඉවත්වී යන විට නැවත ලබාගත හැක.

මේ පිළිබඳව දැන ගැනීමට ඔබට යෑමට මසකටවත් පෙර 150 අංකය අමතා ඒ පිළිබඳව විස්තර දැනගන්න.

ඔවුන් අමතන කල විදේශීය ශ්‍රමිකයන්ගේ දෙපාර්තමේන්තුව හා සම්බන්ද වන්න.

නැතහොත් ඔබට වැරදි තොරතුරු ලැබිය හැක.

(Mahlakat Ovdim Zarim)

ඔබ පිටවීමට පෙර ලබා ගත යුතු ලිපි ලේඛන

(මේවා ගුවන් ගමනේදී ඔබ අතේ රැගෙන යන බෑගයේ තබාගන්න)

• ඔබ ලබාගත් අවසාන වැටුප් පත

• ලිඛිතව ලබාගත් ඔබගේ පාරිතෝෂික දීමනාවේ ලියවිල්ල
(දැනටමත් ඔබට ගෙවා ඇති හෝ අනාගතේ ගෙවන බවට පොරොන්දු සහිතව)

• සේවා ගිවිසුම් ලිපිය (teudat avoda)
මෙය ඔබගේ සේවා කාලය සහ රැකියා ස්වභාවය විස්තර කරයි.
අනාගතයේ වීසා ඉල්ලුම් කිරීමට මෙය අවශ්‍ය වෙයි.

• ඔබගේ B/1 වීසා පිටපත සහ වැඩ බලපත්‍රය

• ඔබගේ සෞඛ්‍ය රක්ෂණය අත්හිට වූ බවට සහතික ලිපිය

• ඔබගේ බැංකු ගිණුම වැසූ බවට සහතික ලිපිය
(ඔබට ඊශ්‍රායලේ බැංකු ගිණුමක් තිබුණානම්)

• ඔබගේ ජාතික රක්ෂණයේ වාරික ගෙවීම් දත්ත වාර්තාව (Bituach Leumi)

• PIBA ආයතනයෙන් ඔබ සම්බන්ධයෙන් ලද කුමන හෝ ලිපි හෝ නිවේදන

ඔබ රටින් පිටවන කල ඔබගේ වීසා තත්වය

වීසා අවසන් වීමට පෙර ඔබ රටින් පිටවුවහොත් ඔබේ පිටවීම පැහැදිලිය.

ඔබේ ආගමන විගමන වාර්තා මත කිසිදු බලපෑමක් නැත.

එහෙත් ඔබ වීසා අවසන් වීමෙන් පසු රටින් පිටවුවහොත් (එය දින කිහිපයක් පමණක් විය හැක) එය ඔබගේ ආගමන විගමන ලියවිලි මත නරක බලපෑමක් කල හැක.

ඊශ්‍රායලයට පමණක් නොවේ, බොහෝ රටවල් මත එය ඔබට සෘණාත්මක වෙයි.

ඔබට මේ අවස්ථාවට මුහුණ දීමට සිදුවුවහොත්, එනම් රටෙන් පිටුවීමට පෙර වීසා අවලංගු වී ඇත්නම්, පහත ක්‍රියාමාර්ග අනුගමනය කරන්න.

දැනට සිදු වී ඇති ගැටළුව විසඳීමට මාර්ග ඇත.

PIBA (1-800-354-554) ආයතනය අමතා ගත හැකි ක්‍රියාමාර්ග දැනගන්න.

විදේශීය සේවකයන්ගේ නීති උපදේශක ආයතනයට කතා කොට උපදෙස් ලබා ගන්න.

HaKeren (1-222-3450)

සරණාගතයන් සහ සංක්‍රමණිකයන් පිළිබඳව විමසීම් කළ හැකි:

03-560-8000

අමතා උපදෙස් ලබා ගන්න.

මෙවන් අවස්ථාවක එම උපදෙස් මත ක්‍රියා කළ හැක.

ඔබට මේ කිසිවක් සඳහා ඉඩ නැති හදිසි අවස්ථාවක් නම්, තවදුරටත් ඔබට රටින් පිටවිය හැක.

එහෙත් පිටවීමේදී අසන ප්‍රශ්නවලට පිළිතුරු දීමට සූදානම් වන්න.

හේතු සඳහා සාධාරණ ලියකියවිලි තිබිය යුතුය.

බෙන් ගුරියොන් ගුවන් තොටුපොළින් පිටවීම

ඔබ පැමිණීමේදී අනුගමනය කළ පිළිවෙතම අනුගමනය කළ යුතු වෙයි.

පැහැදිලි වාර්තා සහිත වීම ඉතා අඩු කාලයක් තුලදී ඔබට පිටවීමට අවස්ථාවක් ලබා දෙයි.

ඔබ කොපමණ කාලයක් ඊශ්‍රායලයේ සේවය කළාද?
ඔබේ සේවා යෝජකයා කවුද?
ඔබට නොවිසඳුණු නීති ප්‍රශ්න තිබේද?

වැනි ප්‍රශ්න ඇසීමට ඉඩ ඇත.

අවංකව පිළිතුරු ලබා දෙන්න.

ඔබේ වාර්තා පිරිසුදු නම් ගැටළුවක් නොවෙයි.

බෙන් ගුරියොන් ගුවන් තොටුපලට පැය තුනකටවත් පෙර ළඟාවන්න.

ඊශ්‍රායලයෙන් පිටවීමේ පරීක්ෂා කිරීම් පෝලිම් ඉතා දිගු ය.

(විශේෂයෙන් ඉරිදා උදයේ සහ සිකුරාදා හවස)

ඔබට නැවතත් ඊශ්‍රායලයට පැමිණිය හැකිද

බොහෝ ශ්‍රීලාංකිකයින්ට දෙවන සහ තෙවන වරටත් ඊශ්‍රායලයට පැමිණ සේවය කිරීමේ අවශ්‍යතාව ඇත.

එයට හැකියාවක් ඇතිද යන්න පහත කරුණු මත තීරණය වෙයි.

විදේශීය ශ්‍රමිකයෙක් හට කොපමණ කාලයක් සේවය කළ හැකිද

විශේෂයෙන්ම සත්කාරක සේවයේ යුතු ඔබට වර්ෂ 5
(මාස 63 ආසන්න ලෙස ඇතැම් නීතිවලට අනුව)

එයින් පසු නැවතත් ඊශ්‍රායලයේ සේවයට යෑමට හැකි නොවේ.

නැවතත් අයදුම් කිරීමට පෙර:

PIBA (1-800-354-554)

හරහා ඔබගේ මුළු සේවා කාලය දැනගන්න.

ඔබේ අදහස් මත යැපීම නිවැරදි නොවිය හැක.

ඔබ අදාළ කාලයට වඩා වැඩි කාලයක් සේවය කිරීම තුළින් නැවතත් ඊශ්‍රායලයට යාමේ හැකියාව අපහසුවේ.

එවිට ඔබගේ අයදුම්පත ඉතාමත්ම තදින් පරීක්ෂාවට ලක්වේ.

ගැටලු රහිතව නීතියානුකූලව පැමිණිලි රහිතව බලපෑම් රහිතව පිටවීම නැවතත් ඊශ්‍රායලයට පැමිණීමට පහසුවකි.

ඊශ්‍රායලය හා ශ්‍රී ලංකාව අතරේ පාර්ශ්වික සම්මුති

ඊශ්‍රායලයෙන් ශ්‍රී ලංකාවට එම වසර තුළ ලබාදුන් ශ්‍රමික කෝටාව, ශ්‍රී ලංකා විදේශ සේවා නියුක්ති කාර්යාංශයේ (SLBFE) සහ ඊශ්‍රායලයේ PIBA ආයතනය සමඟ සිදුවන ශ්‍රමිකයන් බඳවාගැනීමේ වැඩපිළිවෙලක් වේ.

ඔබගේ අතීත වාර්තා, ගැටලු, බලපෑම්, චෝදනා යන තත්ත්වද ඔබගේ ඊශ්‍රායලයට නැවත පැමිණීම තීරණයට හේතු සාධක වෙයි.

ඊශ්‍රායලයට සංචාරක වීසා මත පැමිණෙන්නෙකු පසුව ඊශ්‍රායලය තුළ රැකියාවක නිරත වීම, ඊශ්‍රායලයෙන් පිටුවහල් කිරීමටත් නැවත ශ්‍රමිකයෙක් ලෙස පැමිණීම තහනම් කිරීමටත් හේතුවිය හැක.

නැවතත් ශ්‍රී ලංකාවට රැගෙන යා යුත්තේ

• ඔබ ඊශ්‍රායලය තුළින් ගොඩනගා ගත් වටිනාකම් බොහෝ වෙයි.

• ඔබගේ සේවා ලිපිය (teudat avoda)
මෙය ඔබගේ සේවා හැකියාව පිළිබඳව තක්සේරුවකි.
අනාගත රැකියා ඉල්ලීමකට යහපත් වෙයි.

• බැංකු වාර්තා
මෙම වාර්තා ඔබගේ වැටුප් ඉතිහාසය විදහා දක්වයි.
ඔබගේ බදු සම්බන්ධ කටයුතුවලට මෙය වැදගත් විය හැක.

• ඊශ්‍රායලයේ සෞඛ්‍යායතන විසින් ලබා දුන් ඔබගේ සෞඛ්‍ය සම්බන්ධ වාර්තා.

• (SLBFE) ලියකියවිලි වල ඇති ඔබ රටින් පිට වූ සහ රටට පැමිණීම පිළිබඳ වාර්තා.

ශ්‍රී ලංකාවට පැමිණි වහාම (SLBFE) ට ඔබගේ පැමිණීම වාර්තා කරන්න.

නැවතත් විදේශ සේවයකට යෑමට එවන් නීතිමය වගකීම් දැරීම උපකාරයක් වනු ඇත.

ඔබ පැහැදිලිව පිරිසුදුව යහපත් ලෙස ඊශ්‍රායලයෙන් පිටවීම නැවතත් සේවය සඳහා ඊශ්‍රායලයට පැමිණීමට ඇති හොඳම මාර්ගයයි.

එවන් පිටවීමක් සඳහා ඔබට උපදෙස් අවශ්‍ය නම්:

Go to: LankaConnect.com/ask-the-expert

The post ඊශ්‍රායලයෙන් නීත්‍යානුකූලව පිටවීමේ සැලසුම appeared first on LANKACONNECT.

මෙම ලේඛන සියල්ල සමාන නොවේ.

සාමාන්‍ය පිටපතක් ඔබගේ පරිහරණයට ප්‍රමාණවත් වුවද, PIBA ආයතනයට, රජයේ ලියවිලි සඳහා, නීතිමය ගැටලුවකට, රක්ෂණ කටයුත්තකට එය ප්‍රමාණවත් නොවේ.

සාමාන්‍ය සහතික පිටපත්

නොතාරිස් කෙනෙකු විසින් සහතික කරන ලද ලේඛන පිටපත් බොහෝ රාජ්‍ය කාර්යාල මගින් භාරගනු ලබයි.

එම පිටපත, මුල් ලියවිල්ලෙහි සැබෑ පිටපතක් බව සඳහන් විය යුතු අතර, නොතාරිස්ගේ නිල මුද්‍රාව සහ අත්සනින් සහතික කළ යුතුය.

අපෝස්ටිල් සහතික පිටපත් (Apostille-certified)

මෙය ජාත්‍යන්තර ලේඛන සහතික ක්‍රමවේදයකි.

සහතික කළ පිටපත් ජාත්‍යන්තරව පිළිගනියි.

ඊශ්‍රායලයේ දී සහතික කළ පිටපත් ලබා ගන්නා ආකාර

1 – නොතාරිස් සහතික පිටපත්

නොතාරිස් කෙනෙකු මාර්ගයෙන් සහතික කරන ලද ලේඛන පිටපත් බොහෝ රාජ්‍ය කාර්යාල මගින් භාරගනු ලබයි.

එම පිටපතෙහි මුල් ලියවිල්ලෙහි සැබෑ පිටපතක් බවත් සඳහන් විය යුතු අතර, නොතාරිස්ගේ නිල මුද්‍රාව සහ අත්සනින් සහතික කළ යුතුය.

බොහෝවිට ඔබෙන් ඉල්ලන්නේ මෙම පිටපත් වර්ගයයි.

2 – අපෝස්ටිල් සහතික පිටපත් (Apostille-certified)

මෙය ජාත්‍යන්තරව සහතික ක්‍රමවේදයකි.

සහතික කළ පිටපත් ජාත්‍යන්තරව පිළිගනියි.

ඊශ්‍රායලයේ දී සහතික කළ පිටපත් ලබා ගන්නා ආකාර

1 – නොතාරිස් සහතිකය

ළඟම සිටින නොතාරිස් කෙනෙකු (noter tziburi) වෙත යන්න.

ඔබගේ මුල් පිටපත් රැගෙන යන්න.

එම නිලධාරියා ඒවා පරීක්ෂා කරනු ඇත.

ඔබගෙන් එක පිටුවක් සඳහා සාමාන්‍යයෙන් 30 – 80 NIS අය කරනු ඇත.

2 – අපෝස්ටිල් සහතික (Apostille-certified)

ඊශ්‍රායලයේ ටෙල් අවිවිහි ශ්‍රී ලංකා තානාපති කාර්යාලයෙන්, ශ්‍රී ලංකා ආගමන විගමන දෙපාර්තමේන්තුවෙන් සහතික කළ ගුවන් ගමන් බලපත්‍රය, ජාතික හැඳුනුම්පත, උප්පැන්න සහතිකය වැනි ලියකියවිලි සහතික කරවා ගත හැක.

මෙය අන්තර්ජාතික සහතිකයෙකි.

එහි යෑමට පෙර වෙලාවක් වෙන් කරවා ගන්න.

1 Ben Gorion Street, Bnei Brak
03-527-7635

3 – නීතිඥ සහතිකය

නීතිඥයෙකු හෝ නීති පරීක්ෂකයෙකු – lawyer (advokat) ලවා ඔබට ලියකියවිලි සහතික කරවා ගත හැක.

මෙම ක්‍රමයේදී ඔබට නොතාරිස් කෙනෙකුට වඩා මිල ගෙවීමට සිදුවේ.

බොහෝ ආයතන මෙසේ සහතික කළ පිටපත් භාරගනියි.

මතක තබා ගන්න

ඔබ පිටපතක් අයදුම් කරන සෑම අවස්ථාවකම අවම වශයෙන් පිටපත් දෙකක් හෝ තුනක් ලබාගන්න.

අමතරව තබාගන්නා පිටපත් ඔබට වෙනත් අවස්ථාවක අවශ්‍ය වනු ඇත.

මුදල් හා කාලය ඉතුරු වනු ඇත.

ලියකියවිලි පරිවර්තනය කිරීම

ඔබට සිංහල ලේඛනයක් හීබෘ හෝ ඉංග්‍රීසි භාෂාවට පරිවර්තනය කරගත යුතු විට ස්වෝන් පරිවර්තකයකු ලවා (sworn translator) පරිවර්තනය කරගන්න.

(metargem mugdar)

ඊශ්‍රායලයේ අධිකරණ අමාත්‍යාංශය විසින් පත්කර ඇති නිල පරිවර්තක ඔහු වෙයි.

(Google පරිවර්තනයක් හෝ වෙනත් අන්තර්ජාලීය පරිවර්තනයක් වලංගු නොවන බව මතක තබා ගන්න)

නිලලත් සිංහල පරිවර්තකයකු සොයා ගැනීම

සිංහල – ඉංග්‍රීසි පරිවර්තකයකු සොයාගැනීමට හැකි වුවත්, සිංහල – හීබෘ පරිවර්තකයකු සොයා ගැනීම තරමක් අපහසුය.

එම නිසා ඊශ්‍රායල රජය ඉංග්‍රීසි පරිවර්තනය බොහෝ විට භාරගනී.

ඒ සඳහා:

justice.gov.il

පරිශීලනය කරන්න.

එහි භාෂා යටතේ ඇති සිංහල භාෂාව පිරික්සන්න.

ලංකා තානාපති කාර්යාලයෙන් අනුමත භාෂා පරිවර්තකයන්ගේ විස්තර ලබා ගන්න.

HaKeren
1-222-3450

හෝ අන්තර්ජාල සමූහයන් හරහා විශ්වාස කටයුතු පරිවර්තකයකු සොයාගන්න.

ඇතැම් විශ්ව විද්‍යාල සහ භාෂා ආයතන සිංහල – ඉංග්‍රීසි පරිවර්තන සිදුකරන බව දක්නට ලැබේ.

ඔබේ ලියකියවිලි දෙයාකාරයකින් වර්ග කරගන්න

භෞතික ලියවිලි ගබඩාව

ජලය නොයන ප්ලාස්ටික් අසුරනයක (ඇතුළත වෙන් වෙන් වූ කොටස් ඇති) පහත පරිදි තැන්පත් කරන්න.

1. අනන්‍යතා – ගුවන් ගමන් බලපත්, වීසා බලපත්, හැඳුනුම්පත්
2. රැකියා – රැකියා ගිවිසුම, රැකියා බලපත්‍රය, රැකියා ක්ෂේත්‍රය පිළිබඳ විස්තර
3. මුදල් – වැටුප්පත්, බැංකු වාර්තා, මුදල් ගෙවන ලද ලදුපත්
4. සෞඛ්‍ය – රක්ෂණ කාඩ්පත්, රක්ෂණ ගිවිසුම්, සෞඛ්‍ය වාර්තා
5. සන්නිවේදන – ඔබගේ සේවායෝජකයා, ඒජන්සිය හෝ PIBA ආයතනය අතර සිදුවූ ලිපි ලේඛන

ඩිජිටල් ලියවිලි ගබඩාව

Google Drive තුළ ඉහත ආකාරයටම වෙන් වෙන් කොටස් තුළ අදාළ ලියකියවිලි ඇත්නම් ඒවාද, අදාළ ඡායාරූප ඇත්නම් ඒවාද තබන්න.

ලේඛනයක් ලැබුණු විගසම මෙම භෞතික හා ඩිජිටල් ක්‍රමය යටතේ ආරක්ෂිතව තබන්න.

ශ්‍රී ලංකාවෙන් ලේඛන ගෙන්වා ගැනීම

ඇතැම් විට ඔබට ශ්‍රී ලංකාවෙන් උප්පැන්න සහතික, පොලිස් සහතික වැනි යම් ලේඛන ගෙන්වා ගැනීමට සිදුවනු ඇත.

ඒවා සහතික කළ පිටපත් වීම අවශ්‍ය විය හැක.

ඊශ්‍රායල රජය ඔබෙන් එසේ ඉල්ලූ කල, ඔවුන්ගේ අවශ්‍යතාවය කුමක්ද, කුමන කාණ්ඩය යටතේ ඒවා සහතික කරගත යුතුද යන්න ලිඛිතව ලබා ගන්න.

ඔබගේ විශ්වාසවන්ත පුද්ගලයකු ලවා ලංකාවෙන් අදාල ලියකියවිලි සකසා ගන්න.

ඒවා ශ්‍රී ලංකාවේ විදේශ කටයුතු අමාත්‍යාංශයේ බාහිර සම්පත් දෙපාර්තමේන්තුව යටතේ අපෝස්ටයිල් නිලධාරියකු ලවා සහතික කරවා ගන්න.

දැන් ඔබට මෙම ලේඛන කුරියර් මාර්ගයෙන් ගෙන්වා ගත හැක.

Scan කිරීම මගින්ද ඔබට ලබා ගත හැක.

ඒ පිළිබඳව ඊශ්‍රායලීය රාජ්‍ය අංශය විමසන්න.

ශ්‍රී ලංකාවේ අපෝස්ටයිල් සහතිකයකට යම්කිසි කාලයක් ගත වෙයි.

ඒ පිළිබඳ දැනුවත් වන්න.

කල් වේලා ඇතුව සූදානම් වන්න.

ඔබ යම් රාජ්‍ය ආයතනයකට යාමට පෙර ඒ පිළිබඳව ඔවුන්ගෙන් විමසා බැලීමෙන් කාලය ඉතිරි කර ගැනීමට හැකිවෙයි.

(අවශ්‍ය කුමන සහතිකද, ඒවා කුමන ආකාරයෙන් සහතික කර තිබිය යුතුද වැනි දෑ)

තවදුරටත් විස්තර අවශ්‍ය නම්:

Go to: LankaConnect.com/ask-the-expert

The post ලේඛන / පිටපත් / පරිවර්තන සහ වාර්තා ලබා ගැනීමේ නිවැරදි මග appeared first on LANKACONNECT.

ඊශ්‍රායලය වෙසෙන බොහෝ විදේශිකයන්, නීතිමය ගැටලුවලට හසුවන්නේ ඔවුන් සිතා මතා කරන වැරදිවලින් නොව අතපසුවීම් සහ අමතක වීම් වැනි සුළු කරුණු නිසාය.

වාසනාවකට මෙන් ඒවා ඉක්මනින් හඳුනා ගන්නා තරමට නිවැරදි කිරීමද පහසුය.

1 – ගමන් බලපත්‍රයේ කල් ඉකුත් වීමේ දිනය නොදැන සිටීම

ඊශ්‍රායල් ආගමන විගමන දෙපාර්තමේන්තුවට අනුව ගමන් බලපත්‍රය සේවා කාලය අවසන් වන දිනයේ සිට තවත් මාස හයක්වත් කාලය තුළ වලංගුතාවයේ තිබිය යුතුය.

ඇතැම් විදේශිකයන් එය හඳුනා ගන්නේ PIBA ආයතනයේදී වීසා අලුත් කිරීමට ගිය අවස්ථාවක විය හැක.

දැන් ඔබ ගිය කටයුත්ත පසෙක තබා ගමන් බලපත්‍රය අලුත් කරවා ගැනීමට යොමු විය යුතුය.

ආරක්ෂාකාරී පියවර

ඔබේ ගමන් බලපත්‍රය කල් ඉකුත් වීමට දින 90 පමණ පෙර සංඥා ලබාදීමක් දුරකථනයේ යොදා ගන්න.

ගමන් බලපත්‍රය අලුත් කරවා ගැනීම සඳහා ටෙල් අවිව්හි ශ්‍රී ලංකා තානාපති කාර්යාලයට යා යුතුය.

ඒ සඳහා සති කිහිපයක් ගතවනු ඇත.

2 – වීසා සහ වැඩබලපත්‍ර වල කල් ඉකුත් වීමේ දිනය පටලවා ගැනීම

ඔබගේ B/1 වීසා බලපත්‍රය සහ වැඩ බලපත්‍රය සම්පූර්ණයෙන් වෙනස් ලේඛන දෙකකි.

කල් ඉකුත් වන දිනයන්ද දෙකකි.

එක බලපත්‍රයක මතකයෙන් අනෙක අමතක විය හැක.

අනෙක් බලපත්‍රයේ කල් ඉකුත් වී ඇත්නම් ඔබ ඒ ගතකරන්නේ නීතියට පටහැනි කාල පරිච්ඡේදයකි.

ආරක්ෂාකාරී පියවර

ඔබේ වැඩ බලපත්‍රය අලුත් කරවා ගැනීමට සේවායෝජකයාට / ඒජන්සියට මතක් කරන්න.

එය ඔබේ වගකීමයි.

3 – ඔබේ ලියකියවිලි වල පිටපත් තබා නොගැනීම

යම්කිසි හදිසි අවස්ථාවක මුල් පිටපතක් නැතිවුවහොත්, හෝ අවතැන් වුවහොත් ඔබේ අනන්‍යතාවය ඔප්පු කිරීමට හැකියාවක් නැති වනු ඇත.

ආරක්ෂාකාරී පියවර

ඕනෑම වැදගත් ලියවිල්ලක් ලැබුණු වහාම එහි පිටපතක් ළඟ තබා ගන්න.

ඩිජිටල් පිටපතක් තමාගේ ජංගම දුරකථනයේ තබාගන්න.

තවත් ඩිජිටල් පිටපතක් විශ්වාසවන්තයෙකු ළඟ තබන්න.

Google Drive සහ email හිද තැන්පත් කර තබන්න.

4 – නිසි අවබෝධයකින් තොරව ලේඛන වල ඔබගේ අත්සන යෙදීම

බොහෝ විට සේවා යෝජකයා ඔබට අත්සන් කරන්න යැයි පවසන ලියකියවිලි වලට ඔබ අවධානයක් නොදී අත්සන් කරයි.

එය ඔබ එකඟ නොවූ වැටුප් අඩු කිරීමක් හෝ වෙනයම් අවාසිදායක තත්වයක් විය හැක.

ආරක්ෂාකාරී පියවර

ඔබ නොදන්නා, ඔබට අවබෝධ කරගත නොහැකි භාෂාවක ලේඛනයක් අත්සන් කිරීමෙන් වළකින්න.

එය අත්සන් කිරීමට පැය 24 කාලයක් ඉල්ලන්න.

ඒ කාලය තුළ ඒ පිළිබඳ අවබෝධයක් ලබා ගන්න.

ඔබට කාලයක් නොලැබෙන්නේ නම් එයම, ලේඛනයේ වංචා සහගත බවට ඉඟියකි.

5 – ගමන් බලපත්‍රය වෙනකෙකු භාරයේ නොතබන්න

මොනයම් හේතුවකට හෝ ඔබගේ ගමන් බලපත්‍රය සේවායෝජකයාට හෝ වෙනත් කිසිම කෙනෙකුට තබා ගැනීමට ඉඩ නොදෙන්න.

සේවා යෝජකයා අතුරුදහන් වුවහොත්, පත්‍රය අවශ්‍ය විට ඔබ ළඟ නොතිබුණහොත් නීතිගරුක නොවීමේ වරදට හසු විය හැක.

ආරක්ෂාකාරී පියවර

ගමන් බලපත්‍රය අවශ්‍ය අවස්ථාවක ඒ වෙනුවට සහතික කරන ලද පිටපතක්ම දෙන්න.

ඇත්තෙන්ම ගමන් බලපත්‍රය දීමට අවශ්‍ය වන්නේ ඔබ රටකින් රටකට යන විටදී සහ PIBA සහතික කිරීම් වලදී පමණි.

එහෙත් ඒ අවස්ථා දෙකේදීම එය භාරදිය යුත්තේ ඔබ විසිනි.

එය ඔබ සතු, ඔබ භාරේ තැබිය යුතු ලේඛනයෙකි.

6 – වීසා අලුත් කර ගැනීම පිළිබඳ “කට වචන” විශ්වාස නොකරන්න

බොහෝ විට වීසා බලපත් ක්‍රියාත්මක වෙමින් පවතින බව පැවසුවද, එසේ නොවන අවස්ථාද, ඔබව රවටා සේවය ලබා ගැනීම සඳහා තබා ගන්නා අවස්ථාද විය හැක.

ආරක්ෂාකාරී පියවර

ඔබේ වීසා අලුත් වීම පිළිබඳ අදාළ ලියකියවිලි ඉල්ලා සිටින්න.

PIBA ආයතනයෙන් ලැබුණු ලදු පතක් හෝ ලියවිල්ලක් ඉල්ලා සිටින්න.

PIBA ආයතනයට ඔබම කතා කොට ඒ පිළිබඳව විමසන්න.

(1-800-354-554)

7 – ලියකියවිලි ඔබගේ දුරකථනය පමණක්ම තැන්පත් කර තැබීම

දුරකථනය නැතිවීම, ක්‍රියාකාරීත්වය අත්හිටීම වැනි ඕනෑම තත්ත්වයක් ඇතිවිය හැක.

එවන් මොහොතක ලියකියවිලි ඇත්තේ ඔබේ දුරකථනයේ පමණක් නම් ඔබ ගැටලුකාරී තත්ත්වයකට මුහුණ දෙයි.

ආරක්ෂාකාරී පියවර

සියලුම වැදගත් ලේඛන වල ඡායාරූප සහ ඩිජිටල් ලේඛන Google Drive, email කරන්න.

ඔබගේ විශ්වාසවන්තයකුගේ දුරකථනයටද යවන්න.

8 – ඔබගේ වැටුප් පත් එකතු නොකිරීම

වැටුප්පත් යනු ඔබට මුදල් ලබා දුන් බවට දෙන සහතිකයයි.

විශේෂයෙන් ඔබ සේවයෙන් ඉවත් වන විට ගණනය කිරීම් සඳහා අත්‍යවශ්‍ය වෙයි.

ආරක්ෂාකාරී පියවර

මුද්‍රිත වැටුප් ලදුපත් ලබාදෙන ලෙස ඉල්ලීමක් කරන්න.

ඔබේ වැටුප සිදුවන්නේ බැංකුව හරහා නම් සෑම මාසයකම බැංකු හරබැර විකාශන පතක් ලබා එකතු කරගන්න. (bank statement)

9 – ඔබගේ රැකියාව අයත් වන්නේ කුමන ක්ෂේත්‍රයකටදැයි නොදැන සිටීම

සියලුම ලේඛන සහිතව නීතිගරුකව ඔබ ජීවත් වෙනවා වුවද අයත් ක්ෂේත්‍රය නොදැන සිටීමෙන් අනවශ්‍ය ගැටළු වලට මැදිවීමට හැක.

ආරක්ෂාකාරී පියවර

ඒජන්සිකරුගෙන් ඔබගේ ක්ෂේත්‍රය පිළිබඳ සරලව විස්තරයක් ලබාගන්න.

ක්ෂේත්‍රය සහ ඊට අදාළ රැකියා පිළිබඳ හොඳ දැනීමක් ලබා ගන්න.

10 – ඔබට අසාධාරණයක් හෝ ගැටලුකාරී තත්ත්වයක් ඇතිවූ කල එය අදාළ ආයතන වෙත දැනුම් දීමට මැලිවීම

බොහෝ විට ශ්‍රමිකයෝ තමන්ගේ සේවායෝජකයා සමඟ ගැටලු ඇතිකර ගැනීමට ඇති අකමැත්ත නිසා ඉවසා සිටියි.

මෙය ගැටලුව භයානක වීමට ප්‍රධාන හේතුවකි.

ආරක්ෂාකාරී පියවර

ඔබගේ ලේඛනවල සහ ජීවන රටාවේ තර්ජනාත්මක තත්වයක් ඇතිවුවහොත් පැය 24 – 48 ඇතුලත අදාළ ස්ථානවලට පැමිණිලි කරන්න.

ඉක්මනින් ක්‍රියාත්මක වීම ගැටලු විසඳා ගැනීමට ඇති හොඳම මගයි.

අනුගමනය කරන්න

ඔබගේ ගමන් බලපත්‍රයේ වලංගුතාවය, වීසා බලපත්‍රයේ වලංගුතාවය සෑම මසකම පළවෙනි දින පරීක්ෂා කරන්න.

වැටුප්පත් එකතු කරන්න.

ලේඛනයකට අත්සන් කිරීමේදී අවබෝධයෙන් අත්සන් කරන්න.

ගමන් බලපත්‍රය ළඟ තබා ගන්න.

සේවය කරන ක්ෂේත්‍රය පිළිබඳව දැනුමක් ඇතිව කරන්න.

ඔබේ ලේඛන ආරක්ෂා කර ගැනීමට අදාළ පියවර අනුගමනය කරන්න.

තවදුරටත් ඒ පිළිබඳ දැනගැනීමට යමක් ඇත්නම්:

Go to: LankaConnect.com/ask-the-expert

The post විදේශීය සේවකයන් අතින් සිදුවන – ප්‍රමාදයන්ට හේතුවන පොදු ලේඛන වැරදි appeared first on LANKACONNECT.

සේවා යෝජකයා වෙනස් කර ගැනීම ශ්‍රී ලාංකික ශ්‍රමිකයන් බොහොමයකට මුහුණ දීමට සිදුවන ගැටලුවකි.

රැකියාව හා සේවායෝජකයා සමඟ ඔබට ඇති බැඳීම්

මූලික වශයෙන් B/1 වීසා මගින් ඔබ, ඔබේ සේවායෝජකයාට නීතියෙන් බැඳේ. (Kvila / hesdrat ha-kvila)

එම බැඳීම මගින් සේවායෝජකයාට සේවා දායකයා පිළිබඳ බලය හිමිවෙයි. මෙය ඊශ්‍රායලයේ ඉහළ උසාවිය මගින් පිළිගත් බලයෙකි.

එය වෙනස් කිරීමට නම් නීත්‍යානුකූල ක්‍රමවේදයක් අනුගමනය කළ යුතුව ඇත. (යාවත්කාලීන PIBA සඳහන් නීති රීති අනුගමනය කළ යුතුය)

සේවා යෝජකයා වෙනස් කිරීමේ හැකියා අවස්ථා

• සත්කාරක සේවකයෙකුට තමා රැක බලා ගත් තැනැත්තා මියගිය කල

• සේවායෝජකයාගෙන් සිදු වූ ශාරීරික, වාචසික සහ ලිංගික අපහරණය පිළිබඳ සාක්ෂි ඉදිරිපත් කිරීමෙන්

• හේතු රහිතව වැටුප් නොගෙවා සිටීම

• සේවකයා සහ සේවායෝජකයා යන දෙදෙනාගේම කැමැත්ත ඇති කල
(සේවායෝජකයා ඔබව මුදා හරින බවට අත්සන් කළ යුතුය)

• සේවා යෝජකයා මාස දෙකක හෝ ඊට වඩා වැඩි කාලයක වැටුප් රඳවාගෙන ඇත්නම්

• ඔබගේ වැඩ බලපත්‍රය කල් ඉකුත් වී ඇති විට සේවා යෝජකයා විසින් එය අලුත් කර නැත්නම්

(මේ සම්බන්ධව පොලිස් පැමිණිලි සහ අදාල ආයතන වලට කළ පැමිණිලි පිටපත් තබා ගත යුතුය)

සේවා යෝජකයා වෙනස් කිරීමේ ක්‍රමවේදය

1. ඔබට සේවා ඒජන්තවරයෙකු ඇත්නම් ඒ බව ඔහුට දන්වන්න. ඔබගේ අවශ්‍යතාව ඔවුන් හරහා ලිඛිතව ලබා ගන්න.
2. ඔබේ වර්තමාන සේවායෝජකයා ඔබව නිදහස් කරන බවට අත්සන් කළ ලියවිල්ල ලබාගන්න.
3. ඔහු එය දීම ප්‍රතික්ෂේප කළහොත් අනෙකුත් ලියකියවිලි එනම් පොලිස් පැමිණිලි, සහ අනෙකුත් ලිඛිත සාක්ෂි, නොගෙවූ වැටුප් පිලිබඳ දත්තයන් ආදිය ඉදිරිපත් කළ යුතුයි.
4. සේවා බලපත්‍රයක් සහිත රැකියාවක් දිය හැකි, අලුත් සේවා යෝජකයෙකු ඔබගේ ක්ෂේත්‍රය තුළම සොයා ගන්න.
5. නව සේවා යෝජකයා විසින් ඔබගේ අයදුම් පත, ඔබගේ සේවා මාරු කිරීමේ අයදුම් පත සහ අනෙකුත් අදාල ලේඛන සමග PIBA ආයතනයට භාරදිය යුතුයි.
6. PIBA ආයතනය විසින් ලිපිගොනු පරීක්ෂාවෙන් පසු ඔබගේ සේවා මාරු කිරීම අනුමත කරනු ඇත. මේ සඳහා අවම වශයෙන්ම සති 2 – 8 කාලයක් ගතවෙයි. මෙම කාලය තුළ ඔබ සිටින්නේ ඔබගේ පැරණි සේවායෝජකයා සමඟ නම් දැනට පවතින වීසා වලංගුතාවයේ පවතී.
7. PIBA ආයතනය ඔබගේ සේවා යෝජක වෙනස් කිරීමේ ඉල්ලුම්පත අනුමත කළ විට ඔබගේ නව රැකියාව ඇරඹීමේ නීතිමය අයිතිය ලැබෙයි.

අතපසුවිය හැකි අවස්ථා සහ ඒවා මගහැර ගැනීම

• PIBA ආයතනයේ අනුමැතිය නොමැතිව අලුත් සේවායෝජකයා වෙත නොයන්න.

• නව රැකියාවක් ලැබීමේ සතුට නිසා, ඔබ ගන්නා හදිසි තීරණ පසුව ඔබගේ වීසා බලපත්‍ර මත බලපෑමක් ඇති කළ හැක.

• නව සේවා යෝජකයාගෙන් WhatsApp හරහා ලැබෙන සේවා ගිවිසුම, බලය සහිත ලියවිල්ලක් නොවෙයි.

• PIBA ආයතනයේ අනුමැතිය ලැබෙන තුරු ඔබ අයත් වන්නේ පැරැණි සේවායෝජකයාටය. එවන් හදිසි තීරණ වලින් ඔබ නීතිමය වරදකරුවකු විය හැක.

• ඒජන්සියෙන් ඔබට රැකියාව මාරු කිරීමේ හැකියාවක් නැති බව පැවසුවහොත් එය සාවද්‍ය බව වටහා ගන්න.

• PIBA ආයතනයෙන් සේවායෝජකයා වෙනස් කිරීමේ අයදුම් පත් අනුමත කර ගැනීමෙන් ඔබට එය කරගත හැක.

• එවන් අවස්ථාවක විදේශීය ශ්‍රමිකයන්ගේ උපකාරක අංකය අමතන්න.
(1-800-354-554)

• ඔබේ රැකියා ක්ෂේත්‍රය වෙනස් කිරීම සේවා යෝජකයා වෙනස් කිරීමට වඩා අපහසු ක්‍රියාවලියකි.
(උදා: සත්කාරක සේවයේ සිට කෘෂිකර්මාන්ත සේවයට / භෝජනාගාර සේවයේ සිට හෝටල් සේවයට)

ක්ෂේත්‍රය මාරු කිරීම සඳහා

• ඔබ දැනට පවතින ක්ෂේත්‍රය තුළ රැකියා හිඟ කමක් ඇති බවට සාක්ෂි ලබාගැනීම

• වෙනත් ක්ෂේත්‍රයක සිටින සේවායෝජකයකු යටතේ සේවය කිරීමට අවස්ථාවක් ඇති බව ඔප්පු කිරීම

• PIBA සහ කම්කරු අමාත්‍යාංශයේ අනුමැතිය ලබා ගැනීම

• ඊශ්‍රායලයෙන් පිටවී නැවත පැමිණීමක් ලෙස කිරීමෙන්ද ක්ෂේත්‍රය මාරු කළ හැක

සත්කාරක සේවකයන් සඳහා වැදගත් කරුණු

ඔබ සත්කාරක සේවයේ සිටින්නකු නම් ඔබේ රැකියා ස්ථානයත්, ජීවත්වෙන ස්ථානයත් එකක්ම වන නිසා, සේවායෝජකයා මාරු කිරීම තුළ අලුත් සේවායෝජකයාට යනතුරු ඔබට ජීවත්වීමට ස්ථානයක් අවශ්‍ය වනු ඇත.

ඒ පිළිබඳව දැනුවත් වන්න.

අනුමැතිය එනතුරු ඔබට පැරණි රැකියා ස්ථානයේ හෝ නව රැකියා ස්ථානයේ ජීවත්විය නොහැක.

බොහෝ විට මෙයට විසඳුමක් ලෙස ශ්‍රමිකයන් කරන්නේ තාවකාලික නවාතැනක් සොයා ගැනීමයි.

යහළුවෙක්ගේ හෝ ශ්‍රී ලංකාවේ පොදු එකමුතුවකින් ජීවත්වීමට ස්ථානයක් සොයා ගැනීමයි.

නව රැකියාවේ වැඩ භාරගන්නා තුරු නැවතීමට ස්ථානයක් ලබාදෙනවාදැයි අලුත් සේවායෝජකයාගෙන් ලිඛිතව දැනගන්න.

සේවා මාරුවක් සමගම විශේෂයෙන් සත්කාරක සේවකයන්ට බලපාන මෙම ගැටලුව පිළිබඳ මුලින්ම දැනුවත් වන්න.

සහාය සහ උපදෙස්

HaKeren
1-222-3450

හෝ

ශ්‍රී ලංකා තානාපති කාර්යාලය
1 Ben Gorion Street, Bnei Brak
03-527-7635

සමඟ සම්බන්ධ වී ගත හැකි හොඳම ක්‍රියාමාර්ගය දැනගන්න.

ආරක්ෂිත උපක්‍රම

පැරැණි රැකියාවට අයත් සියලු වැටුප් පත්, සේවායෝජකයා සමඟ කළ දුරකථනමය සංවාද ආරක්ෂිතව තබාගන්න.

යම් ගැටලුවකදී මේවා වැදගත් වනු ඇත.

තවදුරටත් පැහැදිලි කරගත යුතු නම්:

Go to: LankaConnect.com/ask-the-expert

The post සේවා යෝජකයන්, සේවා ක්ෂේත්‍රයන් සහ රැකියා ඒජන්තවරුන් වෙනස් කළ හැකි සැබෑම ක්‍රමවේදය appeared first on LANKACONNECT.

තම භූමිය හැර දමා ඊශ්‍රායලයට පැමිණෙන ඔබට කායික මෙන්ම මානසික ආතතියක් දැනීම සාමාන්‍යය. එහෙත් හොඳින් සංවිධානය වී පැමිණීම, ඊශ්‍රායලයට ලඟාවූ පළමු පැය 48 තුල කළ යුතු දේ පැහැදිලිව කිරීම තුළින් ගැටලු අවම කරගත හැක.

ගුවන් ගමනේ දී අතේ ගෙනයා හැකි බෑගයේ රඳවා තයුතු දේ

• ඔබ ඊශ්‍රායලයේ ජීවත් වීමට බලා‍පොරොත්තු වන කාලයටත් වඩා තවත් මාස හයක වලංගුතාවයකින් යුතු ගුවන් ගමන් බලපත්‍රය

• B/1 work visa – ගුවන් ගමන් බලපත්‍රයට අනුයුක්ත කළ වීසා බලපත්‍රය

• වැඩ බලපත්‍රය (මෙය ඔබගේ ඒජසිකරුවා හෝ බදවාගන්නා විසින් දිය යුතුය)

• අත්සන් කළ රැකියා ගිවිසුමේ පිටපතක්

• සෞඛ්‍ය රක්ෂණය හෝ ස්ථිර කිරීමේ ලිපියක්

• ඔබගේ සේවායෝජකයාගේ විස්තර — නම, ලිපිනය සහ දුරකථන අංක

• ඒජන්සියේ නම, ලිපිනය සහ ඔවුන්ගේ ඊශ්‍රායෙල් දුරකථන අංකය

• ඊශ්‍රායලයේ ශ්‍රී ලංකා තානාපති කාර්යාලය ලිපිනය සහ දුරකථන අංකය

1 Ben Gorion Street, Bnei Brak
03-527-7635

• විදේශීය ශ්‍රමිකයන්ගේ අංකය — 1-800-354-554

• ඔබ ඊශ්‍රායල් ගුවන්තොටුපොලේ දී සම්බන්ධ කරගන්නා පුද්ගලයාගේ විස්තර

• එදින නවාතැන් පිළිබඳ විස්තර

• හදිසි අවස්ථාවක ඇමතීමේ ඊශ්‍රායල් අංක

මේ සියල්ලේ ඡායාරූප ඔබේ දුරකථනයේ ද තබාගන්න.

• 200-300 USD පමණ මුදලක් ද තබාගන්න. (හෝ ඒ සමාන NIS ප්‍රමාණයක්)

Ben Gurion ගුවන්තොටුපොළින් මුදල් මාරු කර ගත හැකි වුවත්, එහි පවතින කලබලකාරීත්වයත්, ඇතැම් විට මුදල් මාරු කිරීමේ අගයන් පහළවීමත් බලපෑ හැක.

පළවෙනි දින කිහිපයේදී ඔබට සුළු වියදම් දැරීමට සිදුවුවහොත් (වැටුප් පිළියෙල වනතුරු) සුළු මුදල් ප්‍රමාණයක් අවශ්‍ය වෙයි.

ඊශ්‍රායලයට පැමිණීමට පෙර සේවායෝජකයාගෙන් ලිඛිතව WhatsApp / Email / SMS හරහා දැනගත යුතු දේ

• ඔබව භාර ගැනීමට Ben Gurion ගුවන් තොටුපලට පැමිණෙන්නාගේ නම සහ දුරකථන අංකය

• ඊශ්‍රායලයට පැමිණි පළමු දින ගත කරන ස්ථානයේ ලිපිනය සහ දුරකථන අංකය

• සේවායෝජකයාගේ නම සහ ලිපිනය

• ඔබගේ රැකියාව සහ අයත් ක්ෂේත්‍රය කුමක්ද යන වග

• ඔබගේ වැඩ බලපත්‍රය PIBA අනුමැතිය සහිත ද යන බව තහවුරු කරගන්න

• එහි ඡායාරූපයක් තබාගන්න

• ඔබ සේවය ආරම්භ කරන දිනය

• කිසියම් හදිසි අවශ්‍යතාවයකදී සම්බන්ධ කර ගත හැකි පුද්ගලයා

• ඔබගේ සෞඛ්‍ය රක්ෂණය ක්‍රියාත්මක වන දිනය

ඉහත තොරතුරු නොමැතිව ඊශ්‍රායලයට පැමිණීම ගැටලුකාරී විය හැක.

එම නිසා තොරතුරු ලිඛිතව තබා ගන්න.

ඔබගේ ලියකියවිලි ඩිජිටල් ලෙස ආරක්ෂා කරගන්න

ඔබේ සියළුම ලියකියවිලි ඡායාරූපගත කොට:

• දුරකථනයේත්

• Google Drive තුලත්

• Gmail හරහාත්

තබාගන්න.

ඔබගේ විශ්වාසවන්තයෙකු සමගද එම ඩිජිටල් ඡායාරූප තබාගන්න.

හදිසි අවස්ථාවකදී ප්‍රයෝජනවත් වනු ඇත.

ඊශ්‍රායල් SIM පතක් ලබාගන්න

හැකි ඉක්මනින් ඊශ්‍රායල් SIM පතක් මිලදී ගන්න.

ඊශ්‍රායල් ගුවන් තොටුපොළින් ඔබට කතා කිරීමේ සහ data සහිත SIM පතක් 50-80 NIS වැනි මුදලකට මිලදී ගත හැක.

එය ඔබේ සේවායෝජකයා සහ ඒජන්සිය හා සම්බන්ධ වීමට පහසුවකි.

මූලික හීබෘ වචන දැනගැනීම

ඔබට ඊශ්‍රායලයේ සේවය කිරීමට හීබෘ භාෂාව දැනගැනීම අවශ්‍ය නොවුණත්, අත්‍යවශ්‍ය වාක්‍ය කිහිපයක් හෝ වචන කිහිපයක් දැනගෙන සිටීම පහසුවකි.

LankaConnect වෙබ් අඩවිය හරහා අත්‍යවශ්‍ය වාක්‍ය කිහිපයක් ඔබට සොයා ගැනීමට හැක.

Ben Gurion ගුවන් තොටුපළේ ආගමන විගමන පරීක්ෂාව

Ben Gurion ගුවන් තොටුපළේ ආගමන විගමන නිලධාරීන් ඔබගේ ගමන් බලපත්‍රය සහ වීසා පරීක්ෂා කරනු ඇත.

ඔවුන් පහත කරුණු පිළිබඳ විමසිය හැක:

• ඔබ ඊශ්‍රායලයට පැමිණෙන්නේ කුමක් සඳහාද

• සේවායෝජකයා කවුද

• ඔබ ජීවත් වන්නේ කොහේද

• කොපමණ කාලයක් මෙහි සිටීමට බලාපොරොත්තු වෙනවාද

අවංකව සහ සන්සුන්ව පිළිතුරු දෙන්න.

ඔබගේ වැඩ බලපත්‍රය පෙන්වීමට අවශ්‍ය වුවහොත් එසේ සිදු කරන්න.

ඔබ රැකියාවක් සඳහා එන විට සංචාරක සඳහා යැයි නොකියන්න.

ගුවන්තොටුපොළේදී ගැටලුවක් ඇතිවුවහොත්

ගුවන්තොටුපොළේදී ඔබව හමුවන පුද්ගලයා, ඔහු ලබාදෙන ලිපිනය, සේවායෝජකයාගේ විස්තර ඔබගේ සේවා බලපත්‍රය සමඟින් සැසඳෙන්නේ නැතිනම්:

• විදේශ ශ්‍රමිකයන්ගේ කාර්යාලය — 1-800-354-554

• ශ්‍රී ලංකා තානාපති කාර්යාලය — 03-527-7635

සමඟ සම්බන්ධව අදාළ තොරතුරු පවසන්න.

ගුවන්තොටුපොළේ පැමිණීමේ අංගනය තුලදීම ගැටලු විසඳා ගැනීම වඩා පහසුය.

ඔබව වැඩිදුර ප්‍රශ්න කිරීමක් සඳහා යොමු කළහොත්

සන්සුන්වට මුහුණ දෙන්න.

භාෂා පරිවර්තකයකුගේ උදව් ලබාගන්න.

යම්කිසි ගැටලුකාරී අවස්ථාවක් වේ නම් ශ්‍රී ලංකා තානාපති කාර්යාලය හා සම්බන්ධ වන්න.

ඔබට තවදුරටත් ගැටළුවක් වේ නම්, මේ සම්බන්ධ විශේෂ දැනුම ඇති පුද්ගලයෙකුගෙන් තොරතුරු පරික්ෂා කරවා ගන්න.

පහත වෙබ් අඩවිය හරහා අවශ්‍ය තොරතුරු ලබා ගැනීමේ හැකියාව ද ඇත:

Go to: LankaConnect.com/ask-the-expert

The post ඊශ්‍රායලයට පැමිණීමට පෙර ඔබ දැනුවත් විය යුතු කරුණු appeared first on LANKACONNECT.

ගිවිසුම හොඳින් කියවීමටත් අධ්‍යයනය කිරීමටත් ඔබට පැය විසිහතරක කාලයක් නීතියෙන් අවසර තිබේ.

ඊශ්‍රායලයේ ගිවිසුම් බොහෝවිට ඇත්තේ හීබෘ භාෂාවෙනි. එහි පරිවර්තනයක් ඉල්ලා සිටින්න.

ගිවිසුමේ ඡායාරූපයක් Google පරිවර්තනය හරහා පරිවර්තනය කොට අවම වශයෙන් දළ අදහසක්වත් ලබා ගන්න.

හීබෘ භාෂාව ඔබට පැහැදිලි කර දිය හැකි ඔබගේ මිතුරෙකුගෙන් හෝ WhatsApp සමූහයකින් පැහැදිලි කරගන්න.

HaKeren
Hotline: 1-222-3450 / *3450

විදේශීය ශ්‍රමිකයන්ට නීති උපදෙස් ලබාදෙන ආයතනයෙන් ගිවිසුමේ ඇති ඔබට අපැහැදිලි තැන් පිළිබඳ දැනුවත් වන්න.

ගිවිසුම අත්සන් කිරීමට පෙර පහත සඳහන් කරුණු විමසා බලන්න

සම්පූර්ණ මාසික අවම වැටුප

6,443 NIS
(අගයක් ලෙස ගිවිසුමේ සඳහන් විය යුතුය)

එය වසරකට වරක් වැඩි විය යුතුයි.

gov.il වෙබ් අඩවියෙන් විස්තර දැන ගන්න.

සේවා කාලය සහ අතිකාල

නීතියට අනුව සතියකට පැය 42ක උපරිමයකින් සේවය කළ හැක.

දවස් පහක සතියක් සඳහා දිනකට පැය 8.5 කි.

මීට වඩා වැඩිවන පැය සඳහා අතිකාල ගෙවිය යුතුය.

• අතිකාල පළවන පැය දෙකට පැයකට 125%

• ඉන්පසු එකතුවන පැයක් සඳහා පැයකට 150%

සතියකට සේවය කළ යුතු කාලය, දිනකට සේවය කළ යුතු කාලය, අතිකාල දීමනා යන දේ පිළිබඳව ගිවිසුම පැහැදිලි කළ යුතුය.

සති නිවාඩු සහ වාර්ෂික නිවාඩු

සතියට දිනක් බැගින් නිවාඩු හිමිය.

ජුදා වැසියන්ට නම් එය සිකුරාදා හෝ සෙනසුරාදා දිනයකි.

විදේශීය ඔබට දිනය වෙනස් විය හැක.

සතියකට දින පහක් සේවය කරන සේවකයන් සඳහා අවම වාර්ෂික නිවාඩු දාහතරක් ඇත.

සාමාන්‍ය සතියකට සේවය කරන දින ගණන මත ඔබ ලබන නිවාඩු දින ගණන වැඩිවෙයි.

වාර්ෂික නිවාඩු, සතියේ නිවාඩු දිනය ගිවිසුමේ ලිඛිතව තිබිය යුතුය.

වාචිකව පවසන දේ නීත්‍යානුකූල නොවේ.

නිවාස සහ ආහාර

සත්කාරක සේවයේ නියුතු ඔබ ජීවත් වන්නේ රැකබලා ගන්නාගේ නිවසෙහිම නම්, ඔබගේ ආහාර හෝ නිවාස සඳහා කිසියම් මුදලක් අඩු කරගත හැක.

නමුත් එය ඔබේ වැටුපෙන් 25% උපරිමයක යටත්ව පමණි.

ගිවිසුමේ මෙය සඳහන් ආකාරය පිළිබඳ විමසිලිමත් වන්න.

ඔබෙන් අඩුකරගන්නා මුදල දැනගන්න.

ඔබට සපයන ලද නිවාසය:

• පෞද්ගලික කාමරයක්ද

• බෙදා ගන්නා කාමරයක්ද

• මහල් නිවාසයක්ද

යන්න ගිවිසුම්ගත වීමට පෙර නිරීක්ෂණයෙන් තහවුරු කරගන්න.

සෞඛ්‍ය රක්ෂණය

විදේශික ශ්‍රමිකයන් සඳහා සෞඛ්‍ය රක්ෂණයක් අනිවාර්යයෙන් හිමිය.

එය ඊශ්‍රායලය තුළ පදිංචි වී ඇති සෞඛ්‍ය රක්ෂණ සමාගමකට අයත් එකක් විය යුතුය.

එම සමාගම පිළිබඳව ඔබගේ ගිවිසුමෙහි සඳහන් දැයි පරීක්ෂා කරන්න.

එයට වාරික ගෙවන්නේ කව්දැයි පරීක්ෂා කරන්න.

ඔබෙන් යම්කිසි කොටසක් ලබා ගන්නේ නම් එය නීතියට එකඟ පරිදි විය යුතුය.

රැකියාව නතර කිරීමේදී

වසරක සේවා කාලයකින් පසු මෙම සේවාව නතර කිරීමේ අවශ්‍යතාවයක් ඇතිවුවහොත්, දෙපාර්ශවයෙන්ම මාසයක දැනුම් දීමේ කාලයක් ලබා දිය යුතුය.

එම කාලය අඩු වන තරමට සේවාදායකයාට හානිදායක වෙයි.

ගිවිසුමේ ඇති එවන් කරුණු සූක්ෂමව දැන ගන්න.

බඳවා ගැනීමේ ගාස්තු

ඊශ්‍රායලීය නීතිය අනුව බඳවා ගැනීමේ ගාස්තු සේවා දායකයාගෙන් අය නොකර ගත යුතුය.

ඒජන්තවරයකු සම්බන්ධ වුවහොත් ඔහු හරහා සේවායෝජකයාට හෝ වෙනත් පාර්ශවයකට මුදල් ගෙවීමේ අවශ්‍යතාවයක් පැවසිය හැක.

එවන් එකඟතා සඳහා අත්සන් නොකරන්න.

ඔබ රැවටීමට ඉඩ ඇත.

ගිවිසුමේ පහත කරුණු ඇත්නම් නීති විරෝධීය

• සේවායෝජකයාට ඔබේ ගමන් බලපත රඳවා තබා ගැනීමට ඉඩ

• ඔබගේ වැටුප තැන්පතුවක් ලෙස තබා ගැනීම

• ඔබේ සේවක අයිතිවාසිකම් උල්ලංඝනය වන අවස්ථාවකදී පවා ඔබ නීතියේ පිළිසරණ නොපැතීම

• ගෙවීමකින් තොර අතිකාල සේවය කිරීමට එකඟවීම

• දැනුම් දීමකින් තොරව ගිවිසුම වෙනස් කිරීමට හැකියාව

ගිවිසුමේ පිටපත් 3 ක් තබාගන්න

1. ආරක්ෂිත ස්ථානයක තමා භාරයේ
2. ඩිජිටල් පිටපතක් / ඡායාරූපයක් Google Drive සහ Gmail හි
3. පිටපතක් ලංකාවේ විශ්වාසවන්තයෙකු ළඟ

තවදුරටත් ගැටලුවක් නම්

Ministry of Labor enforcement unit
054-478-4551

සේවක අයිතිවාසිකම් දෙපාර්තමේන්තුවෙන් විමසීමෙන්ම ඔබ සුරක්ෂිත වෙයි.

විශේෂඥ නිලධාරියෙකු සඳහා

Go to: LankaConnect.com/ask-the-expert

The post සේවා ගිවිසුම අත්සන් කිරීමට පෙර කියවා බැලීම සහ අවබෝධ කර ගැනීම appeared first on LANKACONNECT.

ඊශ්‍රායලයේ රැකියා වීසා ලබා දීමේදී විශේෂ ක්‍රමවේදයක් වෙයි. එනම් එම වීසා යටතේ ඔබට වැඩ කළ හැක්කේ අවසර ලබාදෙන අදාළ ක්ෂේත්‍රයේ, අදාල රැකියා සේවායෝජකයා යටතේ සිදු කරනු ලබන අදාළ රැකියාවයි.

අදාළ රැකියාවට අමතරව සිදුකරන කෙටි තාවකාලික රැකියා ඊශ්‍රායලය තුළ නීත්‍යානුකූල නොවේ.

රැකියා ක්ෂේත්‍රය වෙනස් කිරීම, රැකියාව වෙනස් කිරීම, සේවායෝජකයා වෙනස් කිරීම අදාළ ක්‍රමවේදයන්ට පටහැනිව සිදුවුවහොත් — ඔබ කොතරම් කල් සේවය කළත්, ඔබේ සේවය පිළිබඳ වාර්තා කොතරම් යහපත් වුවත් — නීතිමය මෙන්ම වෙනත් බොහෝ ගැටලුවලට මුහුණපෑමට සිදුවිය හැක.

ලාංකික ශ්‍රමිකයන් බොහෝ සේ නියුතු රැකියා ක්ෂේත්‍රයන්

සත්කාරක උපස්ථායක — Care Giver (Siyud)

වැඩිහිටි පුද්ගලයන් සහ ආබාධිත පුද්ගලයන්ට රැකවරණය සැපයීම, ඔවුන්ට සාත්තු සේවයෙහි යෙදීම මෙහි රැකියා ක්ෂේත්‍රයයි.

බොහෝ විට සේවා ලාභියාගේ නිවසෙහිම රැඳී හිඳිමින් සේවාව සපයයි.

එය වඩාත් පහසුදායක වනවා මෙන්ම වඩාත් සංකීර්ණ වීමේ හැකියාවක් ද ඇත.

සත්කාරක සේවයේ ඔබට අදාළ නීති

• සතියකට එක් නිවාඩු දිනයක් ඔබට හිමිවෙයි.

• මෙම දිනය පිළිබඳ ඔබගේ ගිවිසුමෙහි සඳහන් කළ යුතුය.

• ඔබට එම නිවසේ ජීවත් වනවාට සහ ආහාර සඳහා යම් සාධාරණ මුදලක් පමණක්ම ඔබේ සේවායෝජකයා විසින් වැටුපෙන් කපා ගැනීමට හැක.

• ශ්‍රමිකයෙක්ට අයත් නිවාඩු මෙන්ම සේවය කරන පැය ගණන ද අනෙකුත් බොහෝ අයිතිවාසිකම්ද සත්කාරක සේවකයන්ට උරුම වෙයි.

කෘෂිකර්මාන්ත ක්ෂේත්‍රය (Haklaut)

අස්වැන්න නෙලීම්, වගා කිරීම් සහ ඇසුරුම් කිරීම් වැනි රැකියා ඇත.

බොහෝ විට ශ්‍රමිකයන් ගොවිපළ ආශ්‍රිතවම ජීවත්වෙයි.

කෘෂිකාර්මික ක්ෂේත්‍රයට ආශ්‍රිත ඔබට

• ඉතාමත් ආසන්නයේ ඇති වෙනත් ගොවිපලකට පවා සේවයේ මාරුවීමක් සිදු කරන්නේනම් අදාළ නීතිමය අනුමැතිය ඇති මාරුවක් විය යුතුය.

• ඔබට ජීවත්වීමට ලබා දෙන නිවාසය භාවිතාවට ගැනීමට පෙර ඒ පිළිබඳව විමසා බැලීමට සැලකිලිමත් වන්න.

ගෘහ නිර්මාණ ක්ෂේත්‍රය (Biniya)

අත්තිවාරම් දැමීම, මූලික සැකිල්ල නිර්මාණය කිරීම, උස ගොඩනැගිලි ඉදිකිරීමට සඳහා අවශ්‍ය තාවකාලික ව්‍යුහය සෑදීම (scaffolding) වැනි රැකියා මෙයට අයත් වේ.

මෙම ක්ෂේත්‍රයේ ආරක්ෂිත විධිවිධාන බොහෝ වෙයි.

රැකියාව සඳහා සහතිකයක් තිබීම අවශ්‍යය.

තමා අනුයුක්ත රාජකාරිය මිස වෙනත් රාජකාරිවල නොයෙදිය යුතුය.

හෝටල් ක්ෂේත්‍රය (Malonaut)

හෝටල් පිරිසිදු හා පිළිවෙලකිරීම්, මුළුතැන්ගෙයින් රැකියා, ඇඳුම් පිරිසිදු කිරීමේ රැකියා, හෝටල් ඉදිරිපස අමුත්තන් පිළිගැනීමේ රැකියා යනාදිය මෙයට අයත් වේ.

ලාංකිකයන් සේවය කරන Red Sea ආශ්‍රිත Eilat ප්‍රදේශය උදාහරණයක් ලෙස දැක්විය හැක.

වැඩ මුර ආකාරයෙන් සේවය ක්‍රියාත්මක වන අතර, සවසත්, රාත්‍රියේත්, සති අන්තයේත්, නිවාඩු දිනවලත් රැකියාවෙහි යෙදීමට විය හැක.

හෝටල් සහ ඒ ආශ්‍රිත රැකියාහි යෙදෙන ඔබ

ඊශ්‍රායලයේ බොහෝ හෝටල් දින හතම අවුරුද්ද පුරාම අමුත්තන් වෙනුවෙන් කැපවෙයි.

ඒ නිසාම දවස පුරා වැඩමුර කිහිපයක් තිබිය හැක.

සති අන්තයද සාමාන්‍ය වැඩ කරන දිනයක් මෙනි.

Housekeeping සහ මුළුතැන්ගේ ආශ්‍රිත රැකියා බහුලය.

ඔබගේ වැඩ බලපත්‍රය හෝටලයක් වෙත බැඳී ඇති නිසා, එම හෝටල් දාමයේම ඇති වෙනත් හෝටලයකට වුවත් සංක්‍රමණය වීමට PIBA හරහා අනුමැතිය ලබා ගත යුතුය.

කර්මාන්ත ආශ්‍රිතව (Ta’asiya)

නිෂ්පාදන ක්‍රියාවලියෙහි, ඇසුරුම් කිරීම්, ගබඩා කිරීම් බහුලය.

විශේෂයෙන් පුහුණු වූ කර්මාන්ත ශාලාවකට රැකියා අනුමත කිරීම, වෙනත් කර්මාන්ත ශාලාවකට මාරු කිරීමට නම් PIBA අනුමැතිය ලබා ගත යුතුය.

රෑ වැඩ මුරයක්ද බොහෝ විට ඇත.

කාර්මික හා නිෂ්පාදන අංශයන්හි වැඩ කරන ඔබ

මෙම ක්ෂේත්‍රයට වැඩ බලපත්‍රය එක් එක් කර්මාන්ත ශාලාවටම විශේෂිත වෙයි.

සිදුවන නිෂ්පාදනය හෝ ක්‍රියාව බොහෝ සෙයින් සමානකම් පෙනුණද ඒවා වෙනස්ය.

බොහෝ කර්මාන්ත ක්ෂේත්‍රයන්හි රෑ වැඩමුරය සාමාන්‍ය තත්ත්වයකි.

ඔබ රැකියාව සඳහා ඒමට පෙරම සේවා මුර පිළිබඳව තහවුරුවක් ලබා ගන්න.

රාත්‍රී වැඩ මුර සඳහා විශේෂ ගෙවීමක් කළ යුතුය. ඒ බව ඔබගේ ගිවිසුමෙහි සඳහන් දැයි පරීක්ෂාකාරී වන්න.

භෝජනාගාර සහ ආහාර (Mis’adot)

භෝජනාගාරයක වැඩ කිරීම අභියෝගාත්මකය.

සිකුරාදා හවස් මුරය බොහෝ විට කලබලකාරීය.

පොදු නිවාඩු දිනයන්හි කාර්යබහුලය.

මුළුතැන්ගේ ආශ්‍රිත රැකියා, පිඟන් සහ අනෙකුත් උපකරණ සේදීම්, ආහාර පිළියෙළ කිරීම්, ආහාර අමුත්තන්ට පිළිගැන්වීම්, භෝජනාගාර පිරිසිදු කිරීම මෙයට අයත් වේ.

ඔබේ සේවා බලපත්‍රය එක් භෝජනාගාරයකට පමණි.

ඔබ අනුයුක්ත නොවන භෝජනාගාරයක කෙටි වෙලාවක් හෝ වැඩ කිරීම, යහළුවෙකුට උදව්වක් ලෙස වැඩ කිරීම පවා නීතියට පටහැනිය.

භෝජනාගාරයක වැඩ භාර ගැනීමට පෙර සේවා කාල පිළිබඳව හොඳින් අවබෝධ කරගන්න.

ඔබගේ විවේක දින පිළිබඳවද, අමුත්තන් විසින් ඔබට දෙනු ලබන සතුටු දීමනා වැටුපේම කොටසක් වනවාද නැද්ද යන්නද පැහැදිලිව දැනගන්න.

පොදුවේ ඕනෑම සේවයකදී සේවා ගිවිසුමේ සඳහන් විය යුතු දේ පිළිබඳව පරීක්ෂාකාරී වන්න.

ශ්‍රමික ඔබගේ වැඩ බලපත්‍රය ක්‍රියාත්මක වන අයුරු

ඇත්තෙන්ම ඔබේ වැඩ බලපත්‍රය නිකුත් කොට ඇත්තේ ඔබගේ සේවායෝජකයාටය.

එයින් ඔබේ සේවායෝජකයාට විදේශීය ශ්‍රමිකයෙකු අදාළ රැකියා ක්ෂේත්‍රයේ අදාල රැකියාව සඳහා ලබා ගැනීමට බලය පැවරෙයි.

ඒ සමඟම ඔබගේ තොරතුරු සහ ඔබගේ ගමන් බලපත්‍රයේ තොරතුරු ඔහුට ලබාදෙයි.

කරුණු මෙසේ හෙයින් ඔබගේ සේවා යෝජකයා ඔබගේ වැඩ බලපත්‍රය අලුත් නොකළහොත් හෝ නීතිමය ක්‍රමවේදයකින් තොරව ඔබ සේවායෝජකයා වෙනස් කළහොත් — ඔබේ පෞද්ගලික වරදක් නොමැතිවම ඔබට ඊශ්‍රායලය තුළ සේවය කිරීමේ නීතිමය අයිතිය අහෝසි වෙයි.

ඔබේ මෙම සේවය කිරීමේ අයිතියක් යතුරු වර්ග දෙකකින් විවෘත කළ යුතු දොරකට සමානය. (ද්විත්ව අගුළු)

ඔබ මෙන්ම ඔබේ සේවායෝජකයාගේ එකඟතාවය සහ යහපැවැත්ම මත එය පවතී.

වැඩ බලපත්‍රයක් නොමැතිව හෝ බලපත්‍රයෙන් අනුමත නොවන සේවයක හෝ ක්ෂේත්‍රයක යෙදීමෙන්

නොදැනුවත්කමින් හෝ හදිසි අවස්ථාවකදී පහත කරුණු සිදු විය හැක.

• සත්කාරක සේවයෙහි නියුතු ශ්‍රමිකයෙකු විසින් සේවායෝජිතයාගේ නිවස හෝ ගෙදර පිරිසිදු කිරීම.

• ගොවිපළක වැඩ කරන කම්කරුවකු ලවා වැඩ බිමක සේවයක් කර ගැනීම.

• ශ්‍රමිකයකු විසින්ම තමන්ගේ සේවා යෝජකයා වෙනස් කිරීමට PIBA අයදුම් කර එය ලැබෙන තුරු සේවායෝජකයා සමග සේවය කිරීම.

• සේවා දායකයාගේ වීසා බලපත්‍රය අවලංගු වී ඇතත්, සේවා යෝජකයා විසින් එය සිදුවන බව පවසා සේවයෙහි තබා ගැනීම.

වලංගු බලපත්‍රයක් නොමැතිව එක්වරක් හෝ සුළු වශයෙන් හෝ සේවයේ යෙදීම නීති විරෝධී වේ.

ඔබේ සංක්‍රමණික වාර්තාවන් සඳහාද එය අයහපත් බලපෑමක් ඇති කළ හැක.

අනාගත වීසා බලපත්‍ර නිකුත් කිරීමේදී එය බාධාවක් විය හැක.

වඩා දැඩි අවස්ථාවකදී සේවය අත්හිටුවීමක්, රටින් පිට කිරීමක් සිදුවිය හැකියි.

ඔබ සේවා යෝජකයාගේ වචනය භාරගෙන සිටීම හෝ ඔබ නොදන්නවා යැයි පැවසීම ඔබ සතු වගකීමෙන් මිදීමට හේතු නොවෙයි.

ඔබගේ බලපත්‍රය වලංගු දැයි දැනගැනීමේ විධික්‍රම

• ඔබගේ සේවායෝජකයා හෝ ඒජන්සිකරුවාගෙන් මුද්‍රිත පිටපතක් ඉල්ලා සිටින්න.

• ඔබගේ නම, ගමන් බලපත් අංකය, සේවය කළ යුතු ක්ෂේත්‍රය, අවලංගු වන දිනය සඳහන් වී තිබිය යුතුය.

• PIBA කාර්යාලයට ගොස් ඔබේ ගමන් බලපත්‍ර අංකය පවසා ඔබේ ලිපි ගොනුව පිරික්සා බැලීමට හැකියාව ඇත.

• PIBA ආයතනයට දුරකථන ඇමතුමකින් ඔබගේ සහතිකයේ තත්ත්වය විමසිය හැක.

PIBA Hotline: 1-800-354-554

අවසාන සැලකිල්ල

ඔබේ ගමන් බලපත්‍රය, වීසා බලපත්‍රය සහ වැඩ බලපත්‍රය යන මේවා අවලංගු වීමට දින හැටකටවත් පෙර අලුත් කරවා ගැනීමට සැලසුම් කරන්න.

ඒ සඳහා ඔබට මතක් කිරීමක් දුරකථනයේ තබාගන්න.

ඔබට අයත් ක්ෂේත්‍රයේ පමණක් වැඩ කරන්න.

සේවා යෝජකයාගේ ඉල්ලීමකට හෝ මිත්‍රයෙක්ට උදව්වක් වශයෙන් හෝ කෙටිකාලීන සේවයක් ලෙස හෝ අනවසර තත්ව යටතේ වැඩ නොකරන්න.

ඔබගේ බලපත්‍රවල යාවත්කාලීන කරගත යුතු දින එකිනෙකට වෙනස් වන හෙයින් අවධානයෙන් සිටින්න.

ඔබට සැකයක් ඇතිවන කල විශේෂ දැනුමක් ඇති නිලධාරියෙකුගෙන් විමසන්න.

PIBA සමග බලපත්‍ර පරීක්ෂා කරගන්න.

පහත දැක්වෙන වෙබ් අඩවියෙන්ද අවශ්‍ය දැනුම ලබාගැනීමට හැක:

LankaConnect.com/ask-the-expert

The post ඊශ්‍රායලයේ රැකියා ක්ෂේත්‍රයන්, රැකියා අනුමැතිය සහ එහි සීමාවන් පිළිබඳ අධ්‍යයනය appeared first on LANKACONNECT.

විදේශීය ශ්‍රමිකයෙක් ලෙස ජීවත්වන ඔබට මෙය සිදුවිය හැකි ඉතාමත් අවාසනාවන්ත පීඩනයක් සහිත අවස්ථාවක් වුවත්, නිවැරදි ලෙස ක්‍රියාත්මක වීමට වග බලා ගන්න.

වහාම ක්‍රියාත්මක වීමේදී විසඳා ගැනීමේ හැකියාවද වැඩිය.

• එය නැතිවීමක් හෝ ඔබ ඔබ ළඟ ඇතත් සොයා ගැනීමට නොහැකි අවස්ථාවක්, අස්ථානගත වීමක් විය හැක.
මෙහිදී අදාළ ස්ථානවලට දැනුම් දී නව බලපත්‍රයකට අදාල සියලු කටයුතු වල යෙදෙන්න.

• කිසිවෙකුට සොරකම් කළා යැයි සිතිය හැකි අවස්ථාවකදී:
පළමුවෙන් ළඟම ඇති පොලිස් ස්ථානයට යන්න. ඔබ හීබෘ කතා කිරීමට දන්නා අයෙක් නොවේ නම්, හීබෘ කතා කිරීමට දන්නා කෙනෙකු සමග යන්න. නැතහොත් භාෂා පරිවර්තකයකුගේ සහය ඉල්ලන්න.

පොලිසිය ඔබගේ පැමිණිල්ල භාරගත යුතුයි. පැමිණිල්ලේ පිටපතක් ලබාගන්න. එය අනිවාර්යයෙන්ම ළඟ තබා ගන්න. ඉදිරි සියලුම පියවර සඳහා මේ පිටපත අවශ්‍ය වනු ඇත.

පොලිස් අංක

• පොලිසි හදිසි අංකය: 100
• සාමාන්‍ය අංකය: 110

පොලිසියට යන විට කිසියම් හෝ හදුනා ගැනීමේ පතක්, ශ්‍රී ලංකා පුද්ගලයන් ලියාපදිංචි කිරීමේ කාඩ් පත, රියැදුරු බලපත්‍රය — කුමන හෝ අනන්‍යතාවය ප්‍රකාශ කළ හැකි යමක් රැගෙන යන්න.

ශ්‍රී ලංකා තානාපති කාර්යාලය සම්බන්ධ කරගන්න

ටෙල් අවිවිහි ඇති ශ්‍රී ලංකාවේ තානාපති කාර්යාලය සම්බන්ධ කරගන්න.

ඔබට හදිසි සංචාරක ලේඛනයක් හෝ නව ගමන් බලපත්‍රයක් සාදාගැනීමට අවශ්‍ය වැඩ කටයුතු කළ හැකි එකම ආයතනය ශ්‍රී ලංකා තානාපති කාර්යාලයයි (Emergency Travel Document – ETD).

එහි යෑමට පෙර දුරකථනයෙන් අමතා රැගෙන යා යුතු දේ සහ වෙලාව දැනගන්න.

ශ්‍රී ලංකා තානාපති කාර්යාලය

1 Ben Gorion Street, Bnei Brak
Phone: 03-527-7635
Email: slemb.telaviv@mfa.gov.lk

කාර්යාලීය වේලාවන්:
ඉරිදා සිට බ්‍රහස්පතින්දා දක්වා
උදේ 9 සිට සවස 4 දක්වා

ඔබ ශ්‍රී ලංකා තානාපති කාර්යාලයට යන විට පහත දේ රැගෙන යන්න

• ඔබගේ නැතිවුන ගමන් බලපත්‍රයේ පිටපතක් (ඇත්නම්)
• පොලිස් පැමිණිල්ලේ පිටපතක්
• පාස්පෝට් ප්‍රමාණයේ ඡායාරූප දෙකක්
• ශ්‍රී ලංකා හැඳුනුම්පත (NIC), රියැදුරු බලපත්‍රය වැනි ලියවිලි
• ඊශ්‍රායලයේ වැඩ කරන බවට සාක්ෂි — සේවායෝජකයාගෙන් ලිපියක්, වැටුප් පත්

තානාපති කාර්යාලයෙන් දින 2 – 5 ඇතුළත Emergency Travel Document (ETD) බලපත්‍රයක් ගත හැක. (ගාස්තු අදාළ වේ)

දුරකථන ඇමතුම් මාර්ගයෙන් සොයා බලන්න.

ඊශ්‍රායලයේ ජනගහන හා සංක්‍රමණික අධිකාරිය (PIBA)

Population and Immigration Authority (PIBA) ට දැනුම් දෙන්න.

විදේශික ශ්‍රමිකයන්ගේ හදිසි අංකය:
1-800-354-554

ඉරිදා සිට බ්‍රහස්පතින්දා දක්වා උදේ 8 සිට හවස 6 දක්වා, ඊශ්‍රායෙලය තුළ ඕනෑම දුරකථනයකින් නොමිලේ සේවාව ලබාගත හැක.

ඔබගේ පැරැණි ගමන් බලපත්‍රයේ විස්තර ඔවුන් සතුව ඇත.

ඔවුන්ට සැබෑ තත්ත්වය පැහැදිලි කර දෙන්න.

• ඔබගේ නම
• පැරණි ගමන් බලපත්‍රයේ අංකය
• නැති වූ විස්තර
• සේවා යෝජකයාගේ නම

එසේ නොවුනහොත් ඔබගේ ගුවන් ගමන් බලපත්‍රය නැතිවූ බව වටහා ගත් සැණින්ම ඔවුන් හා ඔබ අතර ඇති සම්බන්ධතාවය බිඳේ.

කාර්යාලයට යාමට අවශ්‍යම නැත. දුරකථන ඇමතුමක් දීමෙන් පවා අදාළ තොරතුරු ලබා දිය හැක.

ඔබගේ සේවා බලපත්‍රය වලංගුයිදැයි දැනගන්න.

නව ගමන් බලපත්‍රය සාදාගන්නා තුරු ගත යුතු ක්‍රියාමාර්ග මොනවාදැයි දැනගන්න.

සේවායෝජකයා ගුවන් ගමන් බලපත්‍රය රඳවා තබා ගන්නා අවස්ථාවක

සේවායෝජකයාට බලපත්‍රය නැවතත් ලබා දෙන ලෙස ඉල්ලීමක් කොට WhatsApp පණිවිඩයක් යවන්න.

එම පණිවිඩයේ screenshot ළඟ තබා ගන්න.

ඔහු එයට ප්‍රතිචාර නොදක්වන්නේ නම්:

• Foreign Workers Hotline: 1-800-354-554
ඔබ වෙනුවෙන් ඔවුන් ඔබේ සේවායෝජකයා අමතා කටයුතු කරනු ඇත.

• HaKeren Hotline: 1-222-3450
මෙය විදේශීය ශ්‍රමිකයන් වෙනුවෙන් පෙනී සිටින NGO ආයතනයකි. ඇතැම් විට ඔබට සිංහලෙන්ද දැනුම් දිය හැකියි.

ඊශ්‍රායලයේ ආර්ථික අමාත්‍යාංශයේ නීති බලහත්කාරක ඒකකයට දැනුම් දෙන්න. ඔවුන් ඔබ වෙනුවෙන් මේ පිළිබඳව ක්‍රියාත්මක වනවා ඇත.

තවදුරටත් මෙසේ සිදුවීම තර්ජනයක් බව පෙනේ නම් එය සාපරාදී ක්‍රියාවකි. වහාම පොලිසියට දැනුම් දෙන්න.

ඔබ ජීවත් වෙන ස්ථානයේ හෝ රැකියාවේ අනතුරුදායක තත්වයක් නොවේනම් එයින් ඉවත් වෙන්න එපා. ඉවත් වූ කල සේවායෝජකයාගෙන් ගමන් බලපතට ලබාගැනීම වඩාත් අසීරු වනු ඇත.

නව ගමන් බලපත්‍රය ලද සැණින්

• සේවා යෝජකයා සහ ඒජන්සි කරුවා දැනුවත් කරන්න.

• නව බලපත්‍රයත්, පොලිස් පැමිණිල්ලත්, තානාපති කාර්යාලීය ලියකියවිලිත් සමඟ ළඟම PIBA කාර්යාලයට ගොස්:
— වීසා බලපත්‍රය
— සෞඛ්‍ය රක්ෂණය
— සේවා අනුමැති ලිපිය
නව බලපත්‍රයට අනුයුක්ත කරන ලෙස ඉල්ලීමක් කරන්න.

• නව ගමන් බලපත්‍රයේ ඡායාරූපයක් Google Drive සහ Gmail වල තැන්පත් කරන්න.

අවධානයට

කිසිවිටෙකත්, කිසිවෙකුට ඔබේ ගමන් බලපත්‍රය දීමෙන් වළකින්න.

අත්‍යවශ්‍ය අවස්ථාවකදී දුන් බවට අත්සන් කරන ලද ලියවිල්ලක් ලබාගන්න.

සියලූම ලේඛනයන් මෙන්ම ගමන් බලපත්‍රයේ ද ඡායාරූපයක් Google Drive හා email එකක තබාගන්න.

විශ්වාසවන්ත පුද්ගලයෙකුගේ WhatsApp අංකයට ඡායාරූප යවා තබාගන්න.

තවදුරටත් ඔබට ගැටලු මතුවේ නම්, Lanka Connect expert corner හි මේ සම්බන්ධ විශේෂ දැනුමක් ඇති අයෙක් සමඟ සම්බන්ධ වී, කළ යුතු දේ පිළිබඳ දැනගන්න.

විමසන්න: LankaConnect.com/ask-the-expert

නිතරම ඔබේ ලේඛන සහ විශේෂයෙන් ගමන් බලපත්‍ර, වීසා බලපත්‍ර, වැඩ බලපත්‍ර පිළිබඳව විමසීමක් කරන්න. වලංගුතාවය පරීක්ෂා කරන්න.

The post ඊශ්‍රායලයේ විදේශ ශ්‍රමිකයෙක් ලෙස ඔබගේ ගුවන් ගමන් බලපත්‍රය අස්ථානගත වුවහොත්, සොරකමක් සිදු වුවහොත් හෝ බලෙන් තබා ගැනීමක් සිදු වුවහොත් appeared first on LANKACONNECT.

ඔබගේ ගුවන් ගමන් බලපත්‍රය යනු සාමාන්‍ය ගමන් ලියවිල්ලක් නොවේ. ඔබ ඊශ්‍රායලයට නීතිගරුකව ඇතුළු වූ බවටත්, සේවය කිරීමට අයිතිය ඇති බවටත් ඔබගේ පෞද්ගලික අනන්‍යතාවය තහවුරු කිරීමටත් වලංගු ලියවිල්ලකි.

මෙවන් වටිනා ලියකියවිලි අස්ථානගත වන්නේ ඔබේ නොසැලකිල්ල නිසාම නොවේ. කාර්යබහුලත්වය, තාක්ෂණික දෝෂ හෝ වෙනත් ගැටළුවක් නිසාද විය හැකිය.

මෙම අත්‍යවශ්‍ය ලියකියවිලි අස්ථානගත වුවහොත්:

• හදිසි අවශ්‍යතාවකදී ඔබේ රටට යාමට නොහැකිි වෙයි.
• ඕනෑම අවස්ථාවක බලපත්‍ර පිළිබඳව නිලධාරීන් ප්‍රශ්න කිරීමට හැක.
• එවිට ඔබගේ සත්‍ය වලංගුතාවය පවා ඔප්පු කරගත නොහැකි වෙයි.

ලියකියවිලි සම්බන්ධව ඊශ්‍රායල නීතිය

ඔබේ සේවා යෝජකයාට හෝ ඒජන්සියට ඔබගේ ගුවන් ගමන් බලපත්‍රය (එසේ අවශ්‍ය වන අවස්ථා නොමැති තරම්ය. ඡායා පිටපතක් හොඳින්ම සෑහේ) ලබා දීමට සිදුවුවහොත් ලිඛිතව පැහැදිලි කිරීමක් ඇති ලිපියක් ලබාගන්න.

ඔබගේ නම, බලපත්‍ර අංකය, ඔවුන් ඒ ලබා ගන්නේ කුමන හේතුවකටද සහ එය නැවත ලබා දෙනු ලබන දිනය සඳහන් කොට ලබාගත් බවට සහතික කොට අත්සන් කිරීමක් ඔවුන්ගෙන් ලබා ගන්න.

සේවා යෝජකයාට ඔබගේ ගුවන් ගමන් බලපත්‍රය තබා ගත හැකි බවට ලියකියවිලි අත්සන් කර නොදෙන්න. එය නීතියට පටහැනිය.

ඔබේ සේවා යෝජකයා විසින් ඔබගේ ලියකියවිලි තබාගෙන සිටින්නේ නම් ඔහු වක්‍රාකාරව ඔබට පීඩනයක් යොමු කිරීමට හැක.

ලියකියවිලි ඔබ සතු අයිතියක් වන අතර කිසිවෙකු විසින් එය උල්ලංඝනයට පත් නොකළ යුතුය.

යම්කිසි අනාරක්ෂිත අවස්ථාවකදී

• විදේශික ශ්‍රමිකයන්ගේ හදිසි අංකය වන
1-800-354-554 ට
මෙහි විවිධ භාෂාවන්ට අවස්ථාව ඇත.

• Lanka Connect community support channel වෙත සම්බන්ධ වන්න.

• ශ්‍රී ලංකා තානාතිපති කාර්යාලය
1 Ben Gorion Street, Bnei Brak
03-527-7635
අමතා ඔබගේ ගැටලුව ඔවුන්ට පවසා උපදෙස් ලබා ගන්න.

ආරක්ෂා කරගත යුතු ලියැකියවිලි අතර

• ගුවන් ගමන් බලපත්‍රය
• B1 වැඩ වීසා පත්‍රය
• සේවා යෝජකයාගේ නම සහිත රැකියා අවසර පත්‍රය
• Ben Gurion ගුවන් තොටුපොළින් ලබා දුන් ඇතුළත් වීමේ වලංගුතා සලකුණ
• සෞඛ්‍ය රක්ෂණ කාඩ් පත හෝ පොලිස් ලිපිය
• සේවා ගිවිසුමේ පිටපතක්
• මාසික වැටුප් වාර්තා
• ශ්‍රී ලංකාවේ ජාතික හැඳුනුම්පත — මෙය ගුවන් ගමන් බලපත්‍රයේ ගැටලුවක දී ප්‍රයෝජනවත් විය හැක.

මෙවන් එක් ලේඛනයක් හෝ අස්ථානගත වීමෙන් ඔබ සිදුකිරීමට සූදානම් වන බොහෝ කරුණු අපහසුවීම හෝ ප්‍රමාද වීමට ඉඩ ඇත.

පහසු මඟපෙන්වීමක්

ඔබගේ ලියකියවිලි වෙනමම විශේෂ තැනක තබාගන්න.
වෙනත් දේ සමග එකට තබා නොගන්න.
එවිට ඔබ අදාළ ස්ථානයට පිළිබඳව හොඳින් දැනුවත්ය.

සෑම ලියකියවිල්ලකම digital පිටපතක් තබා ගන්න.

• ලේඛනවල ඡායාරූප ගෙන Google Drive, Google Photos, clouds වල තබාගන්න.

• ඔබගේම Gmail ලිපිනයට එම ලේඛනවල ඡායාරූප විද්‍යුත් තැපැල් කරන්න.

• විශ්වාසවන්ත කෙනෙකු හට WhatsApp මාර්ගයෙන් යවන්න.

• USB උපකරණයක ඒවා තැන්පත් කර ඔබගේ ඇසුරුමෙහි වෙනමම තබාගන්න.

ඔබගේ ජංගම දුරකථනය හා බෑගය අස්ථානගත වුවත්, ඒවා නැවතත් ලබා ගන්නාතුරු මෙසේ ආරක්ෂිතව තබා ඇති ඩිජිටල් ඡායාරූප මගින් යම් උපකාර තත්ත්වයක් උදාකර ගත හැක.

ඔබේ ගුවන් ගමන් බලපත්‍රය ජලයෙන්, දහඩියෙන්, බීම වර්ගවලින් ආරක්ෂා කරගන්න.

වතුරින් විනාශයට පත් නොවන බහාලුමක බහා තබන්න.

සෑම ලියකියවිල්ලක්ම බහාලුමක තබන්න. වටිනා ලියකියවිලි ලැමිනේට් කිරීමෙන් වලකින්න.

ඔබගේ ගුවන් බලපත්‍රය තුල ඔබව සම්බන්ධ කරගත හැකි විස්තර සහිත කාඩ් පතක් තබන්න:

• ඔබගේ නම
• දුරකථන අංකය

මසකට වරක්වත් සියලූම ලිපි ලේඛනය පරීක්ෂා කර බලන්න.

ගුවන් ගමන් බලපත්‍රය අවම වශයෙන් මාස හයකවත් වලංගුතාවයක තිබිය යුතුයි.

වීසා කාලය පිළිබඳ පරීක්‍ෂාකාරී වන්න.

ඔබගේ B1 වීසා වලංගු කාලය, ඔබගේ සෞඛ්‍යය රක්ෂණය, සේවායෝජකයා එයට දක්වන සහයෝගය, ඔබගේ මාසික වැටුප් වර්තා, ඔබ අත්‍යවශ්‍යයෙන් දැනගත යුතු දුරකථන අංක (සේවායෝජකයා, ඒජන්සිය, හදිසි දුරකථන අංක) වැනි මේ සියල්ල මසකට වරක්වත් පරීක්ෂා කිරීම සුළු වෙලාවක් ගන්නා කරුණක් වුවත් අනාරක්ෂිත බවින් වැළකිය හැකි හොඳම ක්‍රමයකි.

The post ඊශ්‍රායලයේ වෙසෙන විදේශීය ඔබගේ ගුවන් ගමන් බලපත්‍රය, වීසා බලපත්‍රය සහ අනෙකුත් ලියවිලි ආරක්ෂා කර ගැනීම appeared first on LANKACONNECT.